13 qańtarda Qara teńiz aýmaǵynda Kaspıı qubyry konsorsıýmynyń teńiz termınalyna bet alǵan úsh tankerge shabýyl jasaldy. Qazaqstan Syrtqy ister mınıstrligi atalǵan jaǵdaıǵa qatysty málimdeme jarııalady, dep habarlaıdy Egemen.kz.
«Birqatar eýropalyq memleketterdiń elshilerimen ótkizilgen shuǵyl kezdesýler, sondaı-aq amerıkalyq tarappen jáne ózge de sheteldik seriktestermen bolǵan baılanystar barysynda halyqaralyq quqyq normalaryn qatań saqtaı otyryp, kómirsýtegin tasymaldaýdyń, onyń ishinde teńiz joldaryndaǵy qaýipsizdigin qamtamasyz etý boıynsha qajetti sharalar qabyldaýdyń mańyzdylyǵyna erekshe mán berdik», delingen málimdemede.
Resmı ókil Erlan Jetibaev elimiz qandaı da bir qarýly qaqtyǵysqa qatysýshy bolyp tabylmaıtynyn, jahandyq jáne eýropalyq energetıkalyq qaýipsizdikti nyǵaıtýǵa eleýli úles qosyp kele jatqanyn ári energııa resýrstaryn jetkizýdi halyqaralyq talaptarǵa tolyq sáıkes qamtamasyz etip otyrǵanyn erekshe atap ótti.
«Osyǵan baılanysty atalǵan tankerlerdiń barlyq qajetti ruqsattary bolǵanyn jáne talap etiletin sáıkestendirý jabdyqtarymen qamtamasyz etilgenin atap kórsetemiz. Sońǵy ýaqytta mundaı oqıǵalardyń jıileýi halyqaralyq energetıkalyq ınfraqurylymnyń qalypty jumys isteýine tónetin táýekelderdiń artyp kele jatqanyn aıǵaqtaıtynyn atap ótemiz jáne seriktesterimizdi aldaǵy ýaqytta osyndaı oqıǵalardyń aldyn alý maqsatynda birlesken sharalar ázirleý úshin tyǵyz ózara is-qımyl jasaýǵa shaqyramyz», delingen málimdemede.
Aıta keteıik, buǵan deıin Energetıka mınıstrligi 13 qańtarda Qara teńiz akvatorııasynda Kaspıı qubyr konsorsıýmynyń (KQK) teńiz termınaly mańynda Qazaqstan munaıyn tasymaldaıtyn eki kemege shabýyl jasalǵanyn rastaǵan edi.
Eske salaıyq, 29 qarashada Astana ýaqytymen 06:06-da Novorossıısk porty aýdanynda KQK-nyń teńiz ınfraqurylym nysandaryna ekıpajsyz júzý quraldary arqyly shabýyl jasalǵan edi. Nátıjesinde teńizdegi qashyqtaǵy aılaq qondyrǵysy VPÝ-2 (qalqymaly tıeý qurylǵysy) aıtarlyqtaı zaqymdaldy. Ermek Kósherbaev KTK-ǵa jasalǵan shabýyldy Ýkraına tarapymen talqylady. Energetıka mınıstri Erlan Aqkenjenov KTK-ǵa tolyqqandy balama joq ekenin, al ózge baǵyttar tek júktiń belgili bir bóligin ǵana tasymaldaı alatynyn aıtqan edi. Sonymen qatar Májilis depýtaty Aıdos Sarym áleýmettik jelilerde Kaspıı qubyr konsorsıýmynyń termınalyna jasalǵan shabýyldy qoldaǵan azamattardy jaýapqa tartýdy talap etti.