Byltyr jeltoqsanda bul ónimniń jyldyq qymbattaýy 26,2 paıyzǵa jetken. Bul sońǵy bir jyldaǵy eń joǵary kórsetkish. Ulttyq statıstıka bıýrosy dereginshe, kofe baǵasynyń ındeksi jaz aılarynan bastap shapshań ósip, 19 paıyzdan 26 paıyzǵa deıin kóterilgen, dep jazady Egemen.kz.
Baǵanyń bulaı ósýine eń aldymen ınflıasııadan tys faktorlar áser etken. Negizgi sebep – shıkizat qunynyń kúrt qymbattaýy. Jyl sońyna qaraı dándi kofeniń baǵasy 36,3 paıyzǵa ósti. Sonyń saldarynan erıtin kofe de, daıyn kofelik sýsyndar da qymbattady.
Bul jaǵdaı tek Qazaqstanǵa ǵana tán emes. Kofe búkil álemde qymbattap jatyr. Halyqaralyq Trading Economics portalynyń málimetinshe, 2025 jyldyń jeltoqsanynda álemdik bırjada kofe fýnty 4,1 AQSh dollaryna jetken. Bul – sol jyldyń qańtarymen salystyrǵanda 28,1 paıyzǵa joǵary.
Álemdik baǵanyń ósýine klımattyń ózgerýi negizgi sebep bolyp otyr. Arabıka óndiretin basty el – Brazılııada byltyr qýańshylyq boldy. Al Vetnamda 2025 jyldyń jazyndaǵy aptap ystyq robýsta ónimine keri áserin tıgizdi. Nátıjesinde álemdik naryqta usynys azaıdy.
Nelikten tańerteń kofe ishýge bolmaıdy: Kardıolog túsinikteme berdi
Soǵan qaramastan, Qazaqstandaǵy kofe baǵasy áli de eń joǵary elderdiń qataryna kirmeıdi. Numbeo reıtınginde 2026 jyldyń qańtarynda Qazaqstan kapýchıno baǵasy boıynsha 103 eldiń ishinde 77-orynǵa jaıǵasty. Bizde bir kese kapýchıno orta eseppen 2,2 dollar nemese shamamen 1,1 myń teńge turady. Bul Eýropanyń aldyńǵy qatarly elderinen birneshe ese arzan. Mysaly, Danııada bir kese kofe 6,6 dollar, Shveısarııada 6,2 dollar turady.
EAEO elderimen salystyrǵanda da Qazaqstandaǵy baǵa ortasha deńgeıde. Reseıde kapýchıno 2,6 dollar, Belarýste 2 dollar, О́zbekstanda 1,9 dollar shamasynda.
Qaı el kofeni kóp ishedi?
Qazaqstan úshin kofe – tolyqtaı ımporttyq ónim. Ol 47 elden ákelinedi. Negizgi jetkizýshi – Brazılııa. Kedendik statıstıkaǵa sáıkes, 2025 jyldyń qańtar-qazan aılarynda osy eldiń úlesi Qazaqstanǵa ımporttalǵan kofeniń 39,9 paıyzyn quraǵan. Osy kezeńde Brazılııadan shamamen 1,5 myń tonna kofe jetkizilgen, bul bir jyl burynǵydan bir jarym ese kóp. Ekinshi orynda Reseı tur – 937,7 tonna. Sarapshylar bul kólemniń edáýir bóligi reeksport bolýy múmkin ekenin aıtady.
Sońǵy eki jyldaǵy derekter taǵy bir úrdisti kórsetedi. Qazaqstan Vetnamnan kofe ımportyn 3,4 ese, Qytaıdan 43,9 ese arttyrǵan. Bul eldiń brazılııalyq jetkizilimge balama joldardy izdeı bastaǵanyn ańǵartady.
Inklıýzıvti kofehana kópke úlgi
Jalpy, 2025 jyldyń qańtar-qazan aılarynda Qazaqstanǵa 3,7 myń tonna kofe ákelingen. Bul – ótken jylmen salystyrǵanda 26,9 paıyzǵa kóp jáne sońǵy birneshe jyldaǵy eń joǵary kólem. Aqshalaı mánde ımport birden 60,4 paıyzǵa ósip, 36,9 mln dollarǵa jetken.
Álemdik sarapshylar qymbatshylyq saldarynan keı elderde adamdar kofeden bas tarta bastaǵanyn aıtady. Al Qazaqstanda kerisinshe jaǵdaı baıqalady. Ulttyq statıstıka derekterine qaraǵanda, sońǵy úsh jylda Qazaqstan azamattary erıtin kofeni kóbirek tutyna bastaǵan. Byltyrǵy úshinshi toqsanda bir adamǵa shaqqandaǵy ortasha tutyný 77 grammdy quraǵan. Bul aldyńǵy jylmen salystyrǵanda 4,1 paıyzǵa joǵary.