Astanada ótip jatqan Konstıtýsııalyq reforma jónindegi komıssııanyń alǵashqy otyrysynda Qoldanbaly ekonomıkalyq zertteýler ortalyǵynyń ǵylymı jetekshisi Jaqsybek Kúlekeev elimizdegi ǵylymı qyzmettiń Ata Zań deńgeıinde naqty rettelmegenin, sonyń saldarynan el damýyn qamtamasyz etýdegi ǵylymnyń róli men mártebesi tómen ekenin málimdedi, dep habarlaıdy Egemen.kz.
Onyń aıtýynsha, elimizdiń qazirgi damý kezeńindegi basty basymdyqtyń biri – zamanaýı sıfrlyq tehnologııalar men jasandy ıntellektini keńinen qoldanýǵa negizdelgen bilim men ınnovasııaǵa súıengen ekonomıkany qalyptastyrý. Bul baǵyt elimizdiń básekege qabilettiligin arttyryp qana qoımaı, onyń geoekonomıkalyq jáne geosaıası keńistiktegi ustanymyn aıqyndaı túsedi.
«Álemde ǵylym kez kelgen qoǵamnyń eń mańyzdy óndirgish kúshine aınalyp otyr. Bul turǵyda bilim ekonomıkasyn damytý ǵylymmen tikeleı baılanysty ekenin ańǵarmaý múmkin emes. Alaıda elimizdegi ǵylymı qyzmet salalyq zańnamalarmen ǵana rettelip, onyń negizgi qaǵıdattary Konstıtýsııa deńgeıinde naqty bekitilmegen. Ata Zańda ǵylymǵa qatysty arnaıy normalardyń bolmaýy ǵylymı salany aǵymdaǵy memlekettik saıasatqa táýeldi etip, eldiń turaqty damýyn qamtamasyz etýdegi róli men mártebesin álsiretip otyr», dedi ol.
Jaqsybek Kúlekeev ǵylym men ınnovasııanyń konstıtýsııalyq deńgeıde bekitilýi ǵylymı qyzmetti turaqty qarjylandyrýǵa berik quqyqtyq negiz qalyptastyryp, zertteý ortalyqtarynyń, ýnıversıtetterdiń jáne tehnologııalyq kompanııalardyń júıeli ári ornyqty jumys isteýine jol ashatynyn aıtty.
Onyń sózinshe, mundaı normalar kóptegen damyǵan memleketterdiń Konstıtýsııalarynda bar. Atap aıtqanda, ǵylym men ınnovasııaǵa súıenip, eleýli ekonomıkalyq tabysqa qol jetkizgen Germanııa, Japonııa, Ońtústik Koreıa sııaqty elderdi mysalǵa keltirýge bolady. Sondaı-aq Fınlıandııa, Ispanııa jáne Portýgalııanyń óz Konstıtýsııalarynda ǵylymı avtonomııa men akademııalyq erkindikke quqyqty naqty bekitkenin tilge tıek etken maman ulttyń bolashaǵy azamattardyń zııatkerlik jáne tehnologııalyq damýyna tikeleı baılanysty ekenin tereń túsinýden týyndaıtynyn jetkizdi.
«Ulttyq qaýipsizdik turǵysynan alǵanda, ózimizdiń ǵylymı jáne tehnologııalyq ázirlememizdi damytý tehnologııalyq táýelsizdikti nyǵaıtyp, ekonomıkanyń jáne onyń asa mańyzdy ınfraqurylymynyń turaqtylyǵyn qamtamasyz etedi. Sonymen qatar, Konstıtýsııada ǵylymǵa qatysty normalardyń bolýy memlekettiń halyqaralyq bedelin arttyryp, ony progress pen ınnovasııaǵa baǵdarlanǵan el retinde tanytady. Bul ǵylymı-tehnıkalyq damýdyń basymdyq ekenin aıqyn kórsetip, ınvestısııa tartýǵa yqpal etedi. Sondaı-aq álemdik qaýymdastyqtaǵy abyroıymyzdy kúsheıtip, áleýmettik, ekonomıkalyq jáne tehnologııalyq turaqtylyqtyń berik negizin qalaıdy», dedi ol.