Saltanatty jıynda óńir basshysy jınalǵan jurtshylyqty aýyl balalarynyń jarqyn bolashaǵyna jol ashatyn jańa mekteptiń ashylýymen quttyqtap, bilim – el damýynyń tuǵyry ekenin atap ótti. Aýdannyń áleýmettik-ekonomıkalyq damýyna úles qosqan azamattar oblys ákiminiń Alǵys hatymen marapattaldy. Osyndaı qurmet bilim uıasyn sapaly, óz ýaqytynan keshiktermeı salyp, el ıgiligine bergen merdiger mekeme «Baq-bereke» seriktestiginiń mamandaryna da kórsetildi.
Oqý-aǵartý mınıstri Juldyz Súleımenova elimizde júzege asyrylyp jatqan bilim berý jobalaryna toqtalyp, Syr óńirindegi serpindi jumystardy joǵary baǵalady.
«Keleshek mektepteriniń» standartymen salynǵan osy bilim uıasy halyqaralyq talaptarǵa saı mekteptiń aýylǵa da jetkeniniń kýási. Memleket basshysy Qasym-Jomart Toqaevtyń ustazdarǵa degen qamqorlyǵy erekshe, sonyń arqasynda muǵalimderdiń qoǵamdaǵy mártebesi arta tústi. Osynyń arqasynda búginde pedagog mamandyǵy elimizdegi eń tartymdy mamandyqtardyń birine aınaldy. Jańa mekteptiń ujymyn, oqýshylardy, ata-analardy búgingi qýanyshymen quttyqtaımyn», dedi mınıstr.
Jalpy, byltyr Aral aýdanynda 4 mektep paıdalanýǵa berilse, bıyl osyndaı jańalyq shalǵaı aýyl sanalatyn Mergensaıda bolyp otyr. Buryn bir qabatty, eski ǵımaratta oqyp kelgen eldi meken balalaryna jańa úlgimen boı kótergen bilim oshaǵy esten ketpes erekshe tartý boldy.
«О́tken jyly qoldanysqa berilgen 4 mekteptiń ekeýi – «Keleshek mektebi». Al 686 turǵyny bar Mergensaıda osyndaı úlgide bilim oshaǵynyń boı kóterýi memlekettiń bilim salasyna asa mańyz berip otyrǵanyn kórsetedi. Sonymen qatar byltyr ǵasyrdan astam tarıhy bar №14 mektep kúrdeli, taǵy 4 mektep aǵymdaǵy jóndeýden ótip, jańa keıipke endi. Bıyl Sapaq aýylynda da mektep qurylysyn bastaý josparlanyp otyr», deıdi aýdandyq bilim bóliminiń basshysy Sanıra Jannazarova.
Sala mınıstri osy saparynda Baıqońyr qalasyndaǵy №277 mektep-lıseı jumysymen de tanysty. «Qazaqstan halqyna» qory bul oqý ordasyna 245 mln teńge kóleminde qarajat bólip, pándik jáne shyǵarmashylyq kabınetter tolyq jabdyqtalǵan. Qor qoldaýymen ınnovasııalyq observatorııa, zymyran úlgileý, STEM, hımııa, bıologııa, robottehnıka, matematıka, fızıka, geografııa, tarıh, bastaýysh synyp kabınetteri, kitaphana, arnaıy telestýdııa ornatylyp, mekteptiń materıaldyq-tehnıkalyq bazasy jańardy.
Mundaı qoldaýlar aýyl men qala arasyndaǵy bilim berý sapasyndaǵy alshaqtyqty azaıtyp, árbir balaǵa teń múmkindik jasaýǵa negiz bolady.
Qyzylorda oblysy,
Aral aýdany