Qytaı astanasy – Beıjiń qalasynda mánerlep syrǵanaýdan bedeldi «Tórt qurlyq birinshiligi» óz máresine jetti. Álemniń ár qıyrynan jınalǵan kil myqtylar bas qosqan dúbirli dodada elimizdiń namysyn alty sportshy qorǵady. О́kinishke qaraı, baıraqty básekede jerlesterimiz júldeli oryndardan kórine almady.
Jarys shymyldyǵyn muz aıdynyna alǵashqy bolyp shyqqan bıshiler túrdi. Bul synda el namysyn Gaýhar Naýryzova men Boısangýr Datıev qorǵaǵan bolatyn. Alaıda, otandastarymyz jankúıer kútken nátıjege qol jetkize almaı, 15 juptyń arasynda 12-orynǵa taban tiredi. Saıystyń bul túrinde AQSh quramasy tolyq ústemdik qurdy deýge bolady. Júldeli úsh oryndy da muhıttyń arǵy jaǵynan kelgen sportshylar ózara bólisti. Atap aıtqanda, Emılııa Zıngas pen Vadım Kolesnık, Kerolaın Grın men Maıkl Parsons, Ýna Braýn men Geıdj Braýn juptary úzdikter qatarynan kórindi.
Juptyq jarysta aıdyn ıeleri – qytaılyq Sýı Venszın men Han Sýn altyn medaldy moıyndaryna ilse, kúmis júlde japonııalyq Iýna Nagaoka men Sýmıtada Morıgýtıge buıyrdy. Úzdik úshtikti amerıkalyq Alısa Efımova men Mısha Mıtrofanov túıindedi.
Áıelder arasyndaǵy básekede jankúıerler Sofıa Samodelkınaǵa zor úmit artqan edi. Reseıden elimizge qonys aýdarǵanyna kóp bola qoımaǵan 18 jastaǵy sportshy Beıjińdegi sııaqty úlken synaqtarǵa ázirge tolyq daıyn emestigin baıqatty. Ol jarysty 9-orynmen aıaqtady. Bul baǵdarlamada Kúnshyǵys eliniń ókilderine teń keler eshkim bolmady. Nátıjesinde, Amı Nakaı – altyn, Iýna Aokı – kúmis, Mone Tıba qola medaldy qanjyǵalaryna baılady.
Jankúıerler erler arasyndaǵy saıysty, onyń ishinde Mıhaıl Shaıdorovtyń ónerin taǵatsyzdana kútti. О́ıtkeni byltyr aqpanda dál osy týrnırde top jarǵan ol, arada bir aı ótkende álem chempıonatynyń kúmis júldesin oljalaǵan bolatyn. Sol sebepti, Mıhaıldyń Beıjiń muzynda qaıtadan jarqyldaıtynyna senim mol edi. Qysqa baǵdarlama qorytyndysynda Japonııanyń úsh juldyzy – Kao Mıýra, Kadzýkı Tomono, Sota Iаmamotony alǵa jibergen almatylyq saıypqyran tórtinshi satyǵa jaıǵasqan. Sheshýshi sátte baryn salsa, jeńis aýyly alys emes edi. Alaıda erkin baǵdarlamada kópshilik kútkendeı nátıje kórsete almaǵan jerlesimiz 266,20 upaı jınap, besinshi oryndy mise tutty.
Erler arasyndaǵy japonııalyq Mıýra (273,73) bas júldeni ıelense, onyń otandasy Iаmamoto (270,07) qolaǵa qol sozdy. Kúmis medaldy ońtústikkoreıalyq Cha Djýn Hvan (273,62) enshiledi. Ulttyq quramanyń ózge múshelerine toqtalsaq, Dıas Jırenbaev (185,43 upaı) – 19, Oleg Melnıkov (164,34 upaı) 21-satyǵa turaqtady.