Mádenıet jáne aqparat mınıstrligi 20 myńǵa jýyq qoǵamdyq uıym qyzmetin taldap, tekserý júrgizgen. Tekserý nátıjesinde 2025 jylǵy 24 jeltoqsanda Almatydaǵy Ulttyq kitaphanada birqatar azamatqa Baýyrjan Momyshuly atyndaǵy «Namys», «Batyr Shapaǵaty», «El janashyry» tósbelgileri, «Altyn adam» jyl sertıfıkaty men statýetkasy tabystalǵany anyqtaldy. Bul týraly Premer-mınıstrdiń orynbasary Serik Jumanǵarınniń Májilis depýtattaryna bergen jaýabynda aıtylǵan, dep jazady Egemen.kz.
«El janashyry» tócbelgisin satý jáne taratý faktisi boıynsha Dıdar Quıqabaevqa aıyppul salynǵan. Sondaı-aq qazir «Qazaqstan ardagerleri» zańdy tulǵalar birlestigi 2025 jylǵy 25 jeltoqsanda tabystaǵan Baýyrjan Momyshuly atyndaǵy «Namys» tócbelgisine geraldıkalyq saraptama jumystary júrgizilip jatyr.
Búginde Mádenıet jáne aqparat mınıstrligi halyqaralyq jáne TMD elderiniń tájirıbesin zerdeleýge kirisken. «Qoǵamdyq birlestikter týraly» jáne «Kommersııalyq emes uıymdar týraly» zańdarǵa ózgerister men tolyqtyrýlar engizý úshin zań jobasyn ázirlep, pysyqtap jatyr. Ondaǵy normalar qoǵamdyq birlestikterdiń, qoǵamdyq qorlardyń, basqa da úkimettik emes uıymdardyń nagradalaryna qoıylatyn talaptardy kúsheıtýge baǵyttalmaq. Zań qabyldanǵan jaǵdaıda qoǵamdyq birlestikter elimizdiń jáne shetel azamattaryn qoǵamdyq uıymdarǵa sińirgen eńbekteri úshin ǵana ózderiniń nagradalarymen marapattaýǵa quqyly bolady.
Qyrǵyzstan bıligi eks-prezıdent Atambaevty memlekettik nagradalarynan aıyrdy
«Budan bólek elimizde «Qazaqstan Respýblıkasynyń memlekettik nagradalarynyń aqparattyq júıesi» platformasy jumys isteıdi. Sondaı-aq áskerı, arnaýly memlekettik, quqyq qorǵaý jáne ortalyq atqarýshy organdardyń vedomstvolyq nagradalaryn esepke alý jáne salany júıeleý maqsatynda Prezıdent Is basqarmasymen birlese otyryp, «Vedomstvolyq nagradalardyń aqparattyq júıesi» platformasy jasaldy. Aqparattyq júıede árbir memlekettik organnyń ózine tıesili medaldary men tósbelgileriniń jalpy sany, tabystalǵan adamdar jáne olardy berý negizdemeleri týraly aqparattar, vedomstvolyq nagradalardy tabystaý jónindegi komıssııa týraly málimetter qamtylady», delingen Serik Jumanǵarınniń jaýabynda.
Buǵan deıin Májilis depýtaty Maqsat Tolyqbaı beımálim uıymdardyń ońdy-soldy medal, orden tabystap jatqanyn aıtyp, másele kótergen edi.