Isa Baızaqov atyndaǵy oblystyq fılarmonııa bıyl qos birdeı aıtýly datany atap ótedi. О́ner ordasynyń qurylǵanyna 85 jyl tolsa, aqyn, kompozıtor Isa Baızaqov esiminiń berilgenine 55 jyl tolyp otyr.
О́ńirimizdegi irgeli óner ordasynyń mereıtoılyq is-sharalary bastalyp ketti. Jýyqta «Álem yrǵaqtary» atty djaz orkestriniń konserti jáne sırek kezdesetin arhıvtik qujattar qoıylǵan kórme uıymdastyryldy. Kórmede 1941 jylǵy soǵys órti tutanǵan qıyn-qystaý kezeńde Jambyl atyndaǵy Qazaq memlekettik fılarmonııanyń fılıaly retinde ashylǵan óner oshaǵynyń qalyptasý tarıhy baıandalǵan.
«Bizdiń fılarmonııa – óńirimizdegi kásibı mýzyka óneriniń bastaýynda turǵan eń kóne mádenıet mekemesi. Soǵys jyldarynda aspapsyz, kostıýmsiz, tipti turaqty ǵımaratsyz jumys istegen alǵashqy ártisterimizdiń eńbegi eren. Búginde fılarmonııada 300-ge jýyq maman eńbek etip, akademııalyq ónerdiń irgetasyn nyǵaıtyp keledi», deıdi fılarmonııa basshysy Amangeldi Qojanov.
Búginde óner ujymynyń quramynda Rústembek Omarov atyndaǵy Qazaq halyq aspaptar orkestri, sımfonııalyq jáne djaz orkestrleri, «Nur», «Shernııaz» bı ujymdary men «Retro» vokaldyq toby sııaqty jalpy sany 9 shyǵarmashylyq ujym jemisti jumys istep tur. Mereıtoılyq is-sharalar 83-shi jáne 84-fılarmonııalyq maýsymdar boıy jalǵasyn taýyp, kúz aıynda úlken gala-konsertpen qorytyndylanbaq. 85 jyldyq tarıhy bar óner shańyraǵy búginde ulttyq dástúr men zamanaýı trendterdi ushtastyrǵan aımaqtyń basty mádenı brendine aınalyp otyr.
Pavlodar oblysy