Temirtaýdaǵy jylý magıstralindegi jarylys saldarynan birneshe úıdiń turǵyndary bir aptaǵa jýyq jylýsyz qaldy. Qala bıligi máseleni eki kún ishinde sheshýge ýáde bergenimen, 30 gradýs aıazda qalǵan jurtshylyq úshin ár saǵat qymbat, dep jazady Egemen.kz.
Temirtaý qalasynda kommýnaldyq apat saldary aýyr tıdi. Jylý magıstralindegi aqaý saldarynan shamamen otyz ǵımaratta jylý toqtaǵan. Demalys kúnderi aýa temperatýrasy mınýs 30 gradýsqa deıin tómendep, jaǵdaı kúrdelene tústi. Páterlerdegi batareıalar jarylyp, sý jáne káriz júıeleri qatyp qalǵan. Keıbir turǵyndar úılerin ýaqytsha tastap ketýge májbúr boldy.
Máseleniń taǵy bir qyry – jylý jelileriniń quqyqtyq mártebesi. Anyqtalǵandaı, atalǵan úılerge jylý jetkizetin qubyrlar resmı túrde eshbir mekemeniń balansyna alynbaǵan. Turǵyndar kezinde ortalyq júıege ózderi qosylyp, qyzmet aqysyn tólep kelgenimen, qubyrlardyń usaq aqaýlaryn óz qarajatyna jóndep otyrǵan. Al bul jolǵy apattyń aýqymy qalalyq qyzmetterdiń aralasýyn qajet etken.
Temirtaýdyń teń jartysy jylýsyz qaldy
Bılik balama retinde gazǵa qosylýdy usyndy. Alaıda kógildir otyn jelisi bul kóshege tek ótken jyldyń jeltoqsan aıynyń sońynda ǵana tartylǵan. Turǵyndar jańa jylytý júıesine keıinirek kóshýdi josparlaǵan. Apat bul jospardy ózgertti.
Qosylý quny keıbir otbasylar úshin aýyr tıip otyr. Qala ákimdigi bes jylǵa deıin bólip tóleý múmkindigin qarastyryp jatqanyn málimdedi.
«Búginde 26 úıdiń 18-i tehnıkalyq shart aldy. Jeti úıde qurylys-montaj jumystary aıaqtaldy. Bir úıde ortalyq gaz bar», dedi qala ákiminiń orynbasary Rınat Qydyrbekov.
Qazir kóshede gaz jabdyqtaryn ornatý boıynsha jumystar jalǵasyp jatyr. Keıbir turǵyndar týystarynyń úıine ýaqytsha kóshkenimen, barlyǵy birdeı baspanasyn tastap kete almaǵan.
Rýdnyıda qubyr jarylyp, birneshe ǵımarat jylýsyz qaldy
Qala bıligi apat saldaryn joıý men gazǵa qosý jumystary shamamen eki kúnde aıaqtalady dep sendirdi. Turǵyndar bolsa, sýyq qaıta kúsheımeı turyp úılerine jylý berilse eken dep úmittenip otyr.
Qostanaı turǵyndary jylýsyz qaldy