Keshe bochcha sportynan elimizdegi alǵashqy jattyqtyrýshy Sultanbek Orynbasarovty eske alýǵa arnalǵan ashyq respýblıkalyq týrnır máresine jetti. Jeńimpazdardy saltanatty marapattaý rásimi Astanadaǵy jańa Inklıýzıvti sport ortalyǵynda ótti.
Is-sharaǵa Parlament Senatynyń tóraǵasy, Qazaqstan bochcha federasııasynyń prezıdenti Máýlen Áshimbaev qatysty. Dástúrli sporttyq jarys aıasynda alǵash ret óner juldyzdary men belgili tulǵalardyń qatysýymen arnaıy týrnır de uıymdastyryldy.
Máýlen Áshimbaev parasportshylarǵa iltıpat bildirip, alǵashqy jattyqtyrýshy Sultanbek Orynbasarovtyń elimizde paralımpıadalyq bochchanyń qalyptasýyna qosqan úlesine toqtaldy. Sultanbek Orynbasarov múmkindigi shekteýli jastardyń áleýetine senip, olarǵa úlken sportqa jol ashyp bergen edi. Qazaqstan bochcha federasııasynyń Prezıdenti ınklıýzıvti qoǵam qurý baǵytyndaǵy jumysty odan ári jalǵastyrýdyń mańyzyna nazar aýdaryp, bul máselege Memleket basshysy Qasym-Jomart Toqaevtyń basa mán berip otyrǵanyn aıtty.
«Prezıdent Qasym-Jomart Toqaev sportty damytýǵa árdaıym erekshe kóńil bólip, onyń qoǵam úshin máni joǵary ekenin únemi aıtyp keledi. Ár azamatqa teń múmkindik beretin qoǵam qurýdyń mańyzy da Memleket basshysynyń basty nazarynda. Bul qaǵıda jańa Konstıtýsııa jobasynda da erekshe mánge ıe. Búginde Prezıdent qoldaýynyń arqasynda Qazaqstanda parasport qarqyndy damyp, erik-jiger men óz múmkindigine degen senimniń sımvolyna aınalyp otyr. Sondyqtan erekshe qajettiligi bar sportshylarǵa tıisti jaǵdaı jasalyp, bul baǵyttaǵy jumys júıeli túrde jalǵasa beredi», dedi Senat tóraǵasy.
Sondaı-aq Federasııa Prezıdenti búginde Qazaqstanda bochcha sporty qarqyndy damyp kele jatqanyn atap ótti. О́ńirlerde jańa fılıaldardyń ashylýy jáne ata-analar men sportshylar qyzyǵýshylyǵynyń artýy atalǵan sport túriniń qoǵamdaǵy mańyzyn aıshyqtaı túsedi. Máýlen Áshimbaev bochchanyń damýy men paralımpıadashylar sheberliginiń ósýi sporttyń biriktirýshi kúsh ekenin jáne ınklıýzıvti qoǵam ıdeıasynyń ómirsheńdigin kórsetetinin atap ótti.
Bıyl bochchadan ashyq respýblıkalyq týrnır aıasynda alǵash ret óner jáne medıa salasynyń belgili ókilderi qatysqan ınklıýzıvti «Juldyzdar týrnıri» uıymdastyrylǵanyn aıta ketken jón.
«Jyl saıyn bochcha jarysyna qatysýshylar sany artyp kele jatqanyn qýana atap ótkim keledi. Bıylǵy týrnırge elimizdiń 13 óńirinen kelgen 120-ǵa jýyq parasportshy qatysty. Bul bochchanyń Qazaqstan sportynda ózindik orny bar ekenin kórsetedi. Búgingi týrnırge daryndy parasportshylarmen birge belgili azamattardyń da qatysýy – soǵan dálel. О́ner juldyzdary men medıa salasynyń ókilderi alańǵa shyǵyp, bochchanyń árkimge qoljetimdi sport ekenin kórsetip berdi. Osy jerge kelýimizdegi basty maqsat – erekshe qajettiligi bar sportshylarǵa qoldaý kórsetý. Bul týrnır asqaq rýhty, ózara qoldaýdy jáne birlikti dáripteıtin naǵyz merekege aınaldy», dedi Máýlen Áshimbaev.
Sonymen qatar Senat tóraǵasy 19 naýryz kúni «Erekshe» atty fılm qalyń kórermenge jol tartatynyn habarlady. Ol adamnyń tabandylyǵy men múmkindikteri týraly oqıǵalar baıandalatyn týyndy qoǵamda paralımpıadalyq sporttyń mańyzyn nasıhattaýǵa oń yqpal etetinine senim bildirdi.
«Jýyrda, 19 naýryz kúni, elimizdiń barlyq kınoteatrynda bochcha sportyna arnalǵan «Erekshe» fılminiń premerasy ótedi. Bul – berik rýh pen adamgershilik týraly áserli oqıǵa. Fılm kórermendi jigerlendirip, qoǵamnyń paralımpıadalyq sport álemine jańa kózqaraspen qaraýyna jol ashady dep senemiz. Osy oraıda parasportshylarǵa jáne osyndaı mańyzdy áleýmettik bastamalarǵa qoldaý kórsetkeni úshin «Kinopark» kınoteatrlar jelisiniń basshysy Almaz Maldybaevqa alǵys bildiremiz», dedi Senat tóraǵasy.
Uıymdastyrýshylardyń aıtýynsha, bochcha sporttyq oıyn ǵana emes. Ol – eń aldymen, múgedektigi bar balalar men eresekterdiń ońalýyna jáne qoǵamǵa beıimdelýine múmkindik beretin mańyzdy tetik. Turaqty jattyǵýlar sportshylardyń fızıkalyq daıyndyǵyn arttyryp, qımyl-qozǵalys daǵdylary men logıkalyq oılaý qabiletin damytady. Búginde bochcha múgedektigi bar balalar men eresekter arasynda keń taralǵan ári qoljetimdi paralımpıadalyq sport túriniń birine aınalyp otyr.
Bıylǵy týrnır baǵdarlamasyna jeke jarystarmen qatar komandalyq jáne juptyq básekeler de engizildi.
Týrnır qorytyndysynda komandalyq jarysta birinshi oryndy Astana qalasynyń quramasy (Itıana Shıngıshanova, Erhat Almat, Merýert Tilebaldy) ıelendi. Ekinshi oryn Pavlodar oblysynan kelgen komandaǵa (Vıktor Kojevnıkov, Ýlıana Kýlıkova, Aleksandr Kýrmantaev) buıyrsa, úshinshi orynǵa Almaty qalasynyń sportshylary (Alına Karamysheva, Georgıı Pavlenko, Eldar Grebnev) taban tiredi.
VS3 sanatyndaǵy juptyq jarysta birinshi oryndy Jambyl oblysy men Astana qalasynyń atletteri (Dılafrýz Mahmaddýloeva, Temirlan Altynsary) jeńip aldy. Ekinshi orynnan Almaty qalasynyń juby (Mıron Spırıkov, Aısultan Muhan) kórinse, úzdik úshtikti Jambyl jáne Almaty oblystarynyń sportshylary (Andreı Agapov, Nazgúl Isakova) túıindedi.
Sondaı-aq VS4 sanatyndaǵy juptyq jarysta Almaty qalasynyń sportshylary (Elmıra Mýsralıeva, Azamat Aıazbaev) jeńimpaz atandy. Ekinshi oryn Jambyl jáne Mańǵystaý oblystarynyń jubyna (Áıgerim Tynysbaeva, Táttimbet Teńelgenov) buıyrdy.
Aıta keteıik, ashyq respýblıkalyq týrnır 2–6 naýryz aralyǵynda Astanadaǵy Inklıýzıvti sport ortalyǵynda ótti. Is-sharaǵa Qazaqstannyń 13 óńirinen kelgen 119 sportshy qatysty. Olardyń qatarynda Astana, Almaty, Shymkent qalalarynyń, sondaı-aq Qostanaı, Jambyl, Pavlodar, Aqtóbe, Qaraǵandy, Mańǵystaý, Ulytaý, Jetisý jáne Abaı oblystarynyń ókilderi bar.
Jarys Qazaqstan bochcha federasııasynyń bastamasymen, Astana qalasy ákimdiginiń jáne seriktester men demeýshilerdiń qoldaýymen uıymdastyryldy. Is-sharanyń basty maqsaty elimizde paralımpıadalyq qozǵalysty damytý, múgedektigi bar azamattardyń sportpen aınalysý múmkindigin keńeıtý jáne ınklıýzıvti qoǵam qaǵıdattaryn ilgeriletý ekenin atap ótken jón.