Úsh kúnge sozylǵan jarysta 62 elden 503 balýan baq synady. 60 kg salmaqta kúresken Sherzod Davlatov irikteý kezeńinde irkilmeı tek jartylaı fınalda Ýkraına balýany Dılshot Halmatovqa ese jiberdi. Al qola medal úshin taǵy bir otandasymyz Aman Baqytjanmen kúresip jeńiske jetti. 81 kg salmaq dárejesinde beldesken Almat Ádilet altyn medal enshiledi. Almat irikteý saıysynda Moldova, Brazılııa, Estonııa elderiniń balýandaryn yǵystyryp, shırek fınalda ázerbaıjandyq Omar Rajablıdendi, jartylaı fınalda serbııalyq Grýıchıch Vasılıeni eńserdi. Sońǵy beldesýde ázerbaıjandyq Galandarzade Výsaldy jyqty. О́kinishke qaraı qalǵan balýandarymyz júldege qol jetkizgen joq.
Dzıýdodan elimizdiń jasóspirimder quramasy Antalııa (Túrkııa) qalasynda ótken Eýropa kýboginen oljamen oraldy. Eki kúndik qurlyq saıysynda jas talanttar 6 altyn, 3 kúmis, 7 qola medalmen jalpy esepte top jardy. 21 elden 550 balýan kúresken saıysta Bekarys Qudaıbergen (50 kg), Baýbek Ahmet (60 kg), Bekáli Erken (73 kg), Ádiljan Jaýdınov (+90 kg), Fatıma Supyǵalıeva (52 kg), Injý Jumajan (57 kg) chempıon atansa, Rasýlhan Ǵabıt (60 kg), Erkenaz Sembek (57 kg), Toǵjan Tóleýbaı (+70 kg) fınalda súrinip, kúmis medal enshiledi. Qola júlde Ádiljan Nurbeken (50 kg), Erik Úsenov (66 kg), Nuraly Máýlethan (73 kg), Shyńǵys Qonysbek (90 kg), Erdáýlet Jumabaı (+90 kg), Ádııa Jumahmet (40 kg), Zere Talǵatqyzyna (48 kg) buıyrdy.
Sporttyq gımnastıkadan Mılad Karımı álem kýboginde eki kúmis medal oljalady. Ázerbaıjannyń Baký qalasynda ótken saıysta Mılad aldymen erkin baǵdarlamada ekinshi boldy. Odan keıin kermedegi jattyǵý tartysynda qazylar jerlesimizdiń ónerin kúmiske laıyq (15.033 upaı) dep baǵalady. Taıbeılik Tan Szıa-Hýn kermedegi jattyǵý saıysynda 15.366 upaı alyp, jeńimpaz atansa, kolýmbııalyq Anhel Barahas 14.400 upaımen qola medal enshiledi. At jattyǵýynda synǵa túsken jerlesterimiz Narıman Qurbanov 5-orynǵa turaqtasa, Zeınolla Ydyrysov 7-oryndy mise tutty.
Shveısarııanyń Aırolo qalasynda frıstaıl-akrobatıkadan Eýropa kýboginiń kezeńinde Asylhan Asan erler arasyndaǵy jekeleı tartysta 99.84 upaı jınap chempıon atandy. Álem kýbogi kezeńiniń kúmis medalin 99.45 upaı alǵan ýkraınalyq Roman Bondarchýk ıelense, qola medal kanadalyq Ellıot Prımoǵa (93.76 upaı) buıyrdy.
Shańǵymen tuǵyrdan sekirýden jasóspirimder arasyndaǵy álem chempıonaty Norvegııanyń Lıllehammer qalasynda ótti. Jekeleı synda jasóspirimder Olımpıadasynyń chempıony Ilıa Mızernyh 6-orynǵa taban tiredi. Qyzdardyń komandalyq saıysynda Anastasııa Gorýnova, Alısa Sedova, Alena Svırıdenko, Vıktorııa Rýleva 7-oryndy, erler quramasy (Ilıa Mızernyh, Danııl Kalınkın, Artem Meshkov, Davıd Gaal) 6-oryndy qanaǵat tutty.