Parıjde ótken Iаdrolyq energetıka jónindegi ekinshi halyqaralyq sammıt álem elderiniń atom salasyndaǵy áriptestigin jańa deńgeıge kóterýge arnaldy. Jıyn aıasynda Qazaqstan delegasııasy birqatar ekijaqty kezdesýler ótkizip, salalyq yqpaldastyqtyń keleshegin talqylady, dep habarlaıdy Egemen.kz.
Iаdrolyq energetıka jónindegi ekinshi halyqaralyq sammıtke Parlament Májilisiniń Tóraǵasy Erlan Qoshanov bastaǵan delegasııa qatysty. Quramynda Atom energııasy jónindegi agenttiginiń tóraǵasy Almasadam Sátqalıev boldy. Is-sharaǵa 50-den astam eldiń memleket pen úkimet basshylary, halyqaralyq uıymdar, qarjy ınstıtýttary, ónerkásiptik kompanııalar, ǵylymı-sarapshylyq orta ókilderi jınaldy.
Jıyn Fransııa Prezıdenti Emmanýel Makronnyń tóraǵalyǵymen ótken plenarlyq otyryspen ashyldy. Memleket basshysy azamattyq atom energetıkasy energetıkalyq qaýipsizdikti qamtamasyz etýge, turaqty ekonomıkalyq ósimdi qoldaýǵa, klımattyq mindettemelerdi oryndaýǵa múmkindik beretin negizgi faktorlardyń biri ekenine toqtaldy. Bul sala energııa jetkiziliminiń senimdiligin arttyryp, elektr qýatynyń qunyn básekege qabiletti deńgeıde ustap turýǵa jol ashady. Kómirtegi shyǵaryndylaryn edáýir qysqartýǵa yqpal etedi.
Fransııa basshysy halyqaralyq áriptestikti keńeıtý men ıadrolyq otyn jetkizý tizbegin ártaraptandyrýdyń mańyzyn da tilge tıek etti. Osy baǵytta ýran óndirýshi memleketterdiń róli aıryqsha ekeni aıtyldy. Mundaı elderdiń qatarynda Qazaqstannyń da orny bar.
Atom energetıkasyn qaýipsiz damytýdyń joldary qandaı?
Sammıttiń iskerlik baǵdarlamasynda Almasadam Sátqalıev «Jahandyq deńgeıde ıadrolyq otyn jetkizýdiń qaýipsizdigin qamtamasyz etý» taqyrybyndaǵy dóńgelek ústel jumysyna qatysty. Talqylaý barysynda ıadrolyq otyn jetkizýdiń álemdik tizbegin ártaraptandyrý, ozyq otyn tehnologııalaryn damytý, ýran óndirý men qaıta óńdeý áleýetin keńeıtý, halyqaralyq yntymaqtastyqty nyǵaıtý máseleleri kóterildi.
Jıyn aıasynda agenttik tóraǵasy Fransııanyń Atom men balamaly energetıka jónindegi komıssarıatynyń, eldiń Ekonomıka, qarjy jáne ónerkásiptik, energetıkalyq ári sıfrlyq egemendigi mınıstrliginiń basshylyǵymen, atom salasyndaǵy jetekshi kompanııalar ókilderimen kezdesýler ótkizdi. Áńgime barysynda azamattyq atom energetıkasy baǵytyndaǵy ózara is-qımyl, ǵylymı-tehnologııalyq baılanystardy damytý, ónerkásiptik áriptestikti keńeıtý máseleleri talqylandy.
Sammıt qorytyndysynda qatysýshylar Parıj deklarasııasyn qoldaý bastamasyn quptady. Qujat halyqaralyq áriptestikti kúsheıtýge, tómen kómirtekti ári turaqty energetıkalyq júıe qalyptastyrýda azamattyq atom energetıkasynyń rólin arttyrýǵa baǵyttalǵan.
Atom energetıkasy mamandary «Bolashaq» baǵdarlamasy aıasynda bilim alady