Alash kóshbasshysy Álıhan Bókeıhannyń 160 jyldyǵyna oraı Máskeýdegi Halyq sharýashylyǵy jetistikteri kórmesindegi Qazaqstan pavılonyna ult qaıratkeriniń bıýsti ornatyldy.
Qazaqstannyń Reseıdegi elshisi Dáýren Abaev Álıhan Bókeıhannyń Birinshi Memlekettik dýma depýtaty bolǵanyn alǵa tartyp, Alash qaıratkeriniń bıýsti Reseı men Qazaqstan halyqtarynyń ortaq tarıhyna qosqan úlesine qurmet retinde qoıylǵanyn aıtty. Sonymen qatar elshi Álıhannyń murasy búginde eki el arasyndaǵy strategııalyq áriptestik qaǵıdattarynda kórinis taýyp jatqanyn da tilge tıek etti. Sondaı-aq qaıratkerdiń bıýstin ornatýǵa bastamashy kásipker Janbolat Nadyrovqa alǵysyn jetkizdi.
О́z kezeginde Janbolat Nadyrov Álıhannyń ómiri men qyzmetin árdaıym úlgi tutatynyn aıta kelip, Alash kóshbasshysyna eskertkish ornatýdyń mańyzdy ekenine toqtaldy. Onyń aıtýynsha, endi Máskeýge kelgen meımandar Máskeýdegi Halyq sharýashylyǵy jetistikteri kórmesindegi Qazaqstan pavılonyna baryp, Álıhannyń bıýstin kóre alady. Al atalǵan pavılonnyń basshysy Tamara Babakova kórmege kelýshilerdiń kóp ekenin atap ótip, bıýsti kórýge keletinder qatary arta túsetinin jetkizdi.
Sonymen qatar bıýstiń ashylýyna Álıhannyń nemere inisi, professor Nurym Bókeıhanov ta qatysty. Ol atasynyń el úshin orasan zor eńbek sińirgenin aıta kelip: «Álıhannyń bastamasymen Abaıdyń óleńderi jınaqtaldy. Ol tuńǵysh abaıtanýshy boldy, kórnekti aqyn ári fılosoftyń murasyn halyqqa jetkizdi», dedi.
Álıhan bıýstiniń Máskeýde ashylýynyń máni bar. Sebebi Álıhan 1922–1937 jyldar aralyǵynda 15 jyldaı Máskeýde turdy. Sol aralyqta «Kúnshyǵys» baspasynyń qazaq basqarmasynda ádebı qyzmetker bolyp jumys istedi. 1937 jyly naqaq atý jazasyna kesilip, órtelgen súıegi Máskeýdegi Don zıraty aýmaǵyndaǵy shuqyrǵa tastaldy. Bul – kúrdeli kezeńniń úlken tragedııasy edi. Bir aıta keter fakt: osyǵan deıin Álekeńe eskertkish Sankt-Peterbordaǵy Memlekettik Dýma ǵımaraty – Tavrııa saraıyna ornatylǵany málim.