Úkimet 2026-2030 jyldarǵa arnalǵan medısınalyq kómektiń sapasyn basqarýdy jetildirý jónindegi keshendi jospardy bekitti. Qujat Memleket basshysynyń «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty Qazaqstan halqyna Joldaýynda berilgen tapsyrmalardy oryndaý maqsatynda ázirlengen. Tıisti qaýlyǵa Premer-mınıstr Oljas Bektenov qol qoıdy, dep habarlaıdy Egemen.kz.
Jospar derekterge, sıfrlyq quraldarǵa jáne jasandy ıntellekt tehnologııalaryna negizdelgen medısınalyq qyzmet sapasyn baqylaý men basqarýdyń jańa úlgisine kóshýge baǵyttalǵan. Qujat medısınalyq kómektiń sapasy men qaýipsizdigin júıeli túrde jaqsartýǵa, prosesterdiń ashyqtyǵyn arttyrýǵa jáne retteýdiń tıimdiligin kúsheıtýge arnalǵan sharalardy qamtıdy.
Negizgi maqsat – pasıent medısınalyq qyzmetterdiń sapasyn baǵalaý jáne baqylaý úderisiniń belsendi qatysýshysyna aınalatyn model qalyptastyrý.
Keshendi jospar aıasynda júıeni damytýdyń tórt strategııalyq baǵyty aıqyndalǵan. Olar:
Medısınalyq qyzmet kórsetý salasyndaǵy retteýshi quraldardy jańǵyrtý; Jasandy ıntellekt negizinde sapa saraptamasynyń jańa modelin engizý jáne Ulttyq sapa ınstıtýtyn qurý; Kásibı medısınalyq qaýymdastyq pen pasıentterdiń rólin kúsheıtý; Sapany basqarý júıesin tolyq sıfrlyq transformasııalaý.Jospardy iske asyrý medısınalyq kómektiń sapasyn retteýdiń biryńǵaı júıesin qalyptastyrýǵa, medısınalyq uıymdardyń qyzmetindegi ashyqtyqty arttyrýǵa jáne basqarýshylyq sheshimderdi obektıvti derekter negizinde qabyldaýǵa múmkindik beredi. Nátıjesinde 2030 jylǵa qaraı medısınalyq qyzmet sapasynyń negizgi kórsetkishteri jaqsarady dep kútiledi.
Qyzylshaǵa qarsy ekpe medısına qyzmetkerlerine de salynatyn boldy
Qujatta sapany basqarý júıesin sıfrlyq formatqa kóshirý basty mindetterdiń biri retinde belgilengen. Atap aıtqanda, profılaktıkalyq baqylaý júıesin engizý arqyly sarapshynyń avtomattandyrylǵan jumys orny qurylady, al lısenzııadan keıingi baqylaý prosesteri tolyq sıfrlandyrylady.
Zańnamalyq ózgerister aıasynda 2028 jyldan bastap TMKKK jáne MÁMS sheńberinde qyzmet kórsetetin medısınalyq uıymdar úshin mindetti akkredıtasııa talaby engiziledi. Sonymen qatar akkredıtasııadan keıingi monıtorıng júıesin sıfrlandyrý josparlanyp otyr.
Josparǵa sáıkes, medısınalyq uıymdardy lısenzııadan keıingi monıtorıngpen qamtý deńgeıi 70%-ǵa jetedi, al olardyń keminde 80%-y jańa standarttar boıynsha akkredıtteledi.
Sondaı-aq Densaýlyq saqtaýdy damytýdyń ulttyq ǵylymı ortalyǵy bazasynda Ulttyq sapa ınstıtýtyn qurý kózdelgen. Bul ınstıtýt ádisnamalyq jáne taldamalyq ortalyq retinde jumys isteıdi.
Instıtýt qyzmeti Dúnıejúzilik densaýlyq saqtaý uıymynyń tehnıkalyq qoldaýymen júzege asyrylady. Bul Qazaqstanda pasıentterdiń qaýipsizdigine qatysty halyqaralyq deńgeıde moıyndalǵan úzdik standarttardy engizýge múmkindik beredi.
Qosymsha medısınalyq bilim sapasyna qoıylatyn talap kúsheıdi
Budan bólek, medısınalyq kómektiń sapasyn basqarý úderisinde medısınalyq qaýymdastyq pen pasıentterdiń qatysýy keńeıtiledi. Kásibı birlestikter sapany táýelsiz saraptaýǵa jáne mamandardyń klınıkalyq oılaýyn baǵalaýǵa tartylady. Al pasıentterdi qoldaý qyzmetin sıfrlandyrý azamattardyń ótinishteri men shaǵymdaryna naqty ýaqyt rejıminde jedel jaýap berýge jol ashady.
Josparǵa sáıkes, 2028 jylǵa deıin medısınalyq kómek kórsetý standarttary men erejeleri tolyq sıfrlandyrylady, al 2027 jyly sapa saraptamasynyń úsh komponentti modeli engiziledi. Sonymen birge 2028 jylǵa qaraı medısınalyq kómektiń sapasy men kólemin baqylaý jaǵdaılarynyń keminde 20%-y JI tehnologııalary arqyly júzege asady.
Jalpy alǵanda, keshendi jospardy iske asyrý densaýlyq saqtaý júıesindegi barlyq qatysýshylardyń is-qımylyn úılestirýge, medısınalyq qyzmet sapasyn basqarýdyń ashyqtyǵy men tıimdiligin arttyrýǵa múmkindik beredi.
Medısına fakýltetiniń stýdentteri jańa Konstıtýsııa jobasyn talqylady