«Qazaq gazetteri» seriktestiginde Mańǵystaý oblysynyń máslıhat depýtattary men basylym ujymy kezdesti.
Basqosýdy alǵysózimen ashqan «Qazaq gazetteri» seriktestiginiń bas dırektory Dıhan Qamzabekuly ulttyq baspasózdiń eldik sanaǵa qyzmet etetin aıryqsha mıssııasyna toqtaldy.
«Gazet – el aınasy. Qoǵamdaǵy ózgeris pen halyqtyń tynys-tirshiligi eń aldymen baspasózde kórinis tabady. Sondyqtan óńirlerdegi mańyzdy bastamalardyń, sonyń ishinde Mańǵystaýda atqarylyp jatqan ıgi isterdiń respýblıkalyq baspasózde jarııalanýy qoǵam úshin asa mańyzdy», dedi D. Qamzabekuly.
Depýtattardy Mańǵystaý oblystyq máslıhatynyń tóraǵasy Jańbyrbaı Mataev bastap keldi. Bas basylym ujymymen kezdesý barysynda Jańbyrbaı Jánibekuly óńirdegi ıgi jobalardy ortaǵa salyp, nátıjeli bastamalarymen jan-jaqty tanystyryp ótti.
«Rýhanııat – ulttyq jadyny jańǵyrtý, baýyrlas eldermen tarıhı sabaqtastyqty kúsheıtý, jas býynǵa ortaq murany tanytý. Mańǵystaý buǵan erekshe mán beredi. Túrki dúnıesiniń astanasy atanǵan Aqtaý shaharynda ótken halyqaralyq forýmdar men kezdesýler sózimizdiń dáleli bola alady. Mundaı bastamalardyń keńinen jazylyp, jurtshylyqqa jetýi óńirdiń bedelin arttyrady», dedi ol.
Jıyn barysynda Beıneý aýdandyq máslıhat depýtaty Merýert Omarova da óńirdegi ózekti máselelerge toqtaldy. Onyń aıtýynsha, birqatar bastama qazir Úkimet deńgeıinde qaralyp jatyr.
Aıta keteıik, Merýert Omarova – Beıneý aýdanyndaǵy qoǵamdyq bastamalarǵa belsene aralasyp júrgen kásipker ári máslıhat depýtaty.
Byltyrǵy sý tasqyny kezinde kóptegen óńir turǵyndary ábigerge túskeni belgili. Sol qıyn shaqta Mańǵystaý oblysynyń halqy kórshi Atyraý, Aqtóbe, Batys Qazaqstan oblystaryna jan-jaqty kómek uıymdastyrǵan edi. Atyraý oblysynan evakýasııalanǵan 27 myńnan asa adam Mańǵystaý óńirinde ýaqytsha ornalastyryldy. Beıneý aýdandyq máslıhat depýtaty Merýert Omarova. Qulsary qalasynan kelgen 250 turǵyndy óz úıinde kútip, qoldaý kórsetken.
Júzdesý sońynda taraptar aqparattyq áriptestikti nyǵaıtyp, eldik múddege qyzmet etetin birlesken jobalardy júzege asyrýǵa nıetti ekenin bildirdi. Memleket basshysy Qasym-Jomart Toqaev atap ótkendeı, «Máslıhattar – jergilikti ózin-ózi basqarý júıesindegi negizgi ınstıtýt. Onyń tıimdiligi depýtattardyń kásibıligine tikeleı baılanysty». Osy turǵydan alǵanda, óńirlerdegi bastamalardyń eldik deńgeıde kóterilip, ulttyq baspasóz arqyly keńinen jarııalanýy qoǵam úshin aıryqsha mańyzǵa ıe.