Memleket basshysy jańa Konstıtýsııa jobasyna qatysty referendýmda daýys bergennen keıin jýrnalısterge arnalǵan brıfıng ótkizip, suraqtarǵa jaýap berdi, dep habarlaıdy Egemen.kz Aqordanyń baspasóz qyzmetine silteme jasap.
Jýrnalısterdiń biri keıbir sarapshylar «Konstıtýsııalyq reforma – bılik tranzıtine, Prezıdent saılaýyna daıyndyq» degen pikir aıtyp júrgenin atap ótip, Vıse-Prezıdent laýazymynyń ne úshin qajet ekenin surady.
«Vıse-Prezıdent laýazymy týraly ártúrli áńgime aıtylyp júrgenin bilemin. Shyn máninde, birqatar shet memlekette Vıse-Prezıdent laýazymy bar. Keıbir sarapshylar «Qazaqstanda bılik ishinde báseke órship, túrli úrdister júredi, elge zııan keledi» degen pikir bildirýde. Bul máselede qoǵamǵa zardap keletindeı qorqynysh joq. Vıse-Prezıdent laýazymy bizdiń bılik ınstıtýttaryn nyǵaıtady. Keleshekte bári aıqyn bolady. Memleket basshysy retinde bul laýazymǵa, jalpy búkil reformaǵa úlken úmit artyp otyrmyn. Al Prezıdent saılaýy qazirgi Konstıtýsııaǵa sáıkes 2029 jyly óz merziminde ótedi», dedi Memleket basshysy.
Qasym-Jomart Toqaev: Bul Konstıtýsııa elimizdi ilgeriletinine eshqandaı kúmánim joq