Búgin – ulttyq sport kúni. Ár óńirde kilem tóselip atan jilik, apaıtós balýandar beldesedi. Kóldeneń jatqan quba jonnyń topyraǵyn tuıaǵymen týraǵan tulparlar dúbiri estiler alaman báıge, bási joǵary kókpar uıymdastyrylady. Boıjetkenniń betinen óbýge qumbyl qýnaq jigitter qyz qýýǵa túsedi.
Naýryznama aıasynda ótkiziletin sporttyq is-sharalar salamatty ómir saltyn nasıhattaýǵa, ulttyq sport túrlerin damytyp, qoǵamdyq birlikti nyǵaıtýǵa baǵyttalǵan. Merekelik jarystar dástúrli túrde kóp qatysýshy men kórermendi jınap, kóktemgi jańarý men birlik merekesine aınalyp keledi.
Ataýly kúnge oraı jer-jerde sporttyq oıyndar, túrli saıystar uıymdastyrylady. Máselen, Túrkistan qalasynda jańadan boı kótergen atshabarda kókpardan álem chempıonaty túńligin túrdi. Sońǵy ret 2017 jyly uıymdastyrylǵan álemdik doda araǵa toǵyz jyl salyp qaıta jalaýyn tiktedi. Bıylǵy jahandyq saıysta toǵyz memlekettiń komandalary baq synaıdy. Elimizdiń ulttyq quramasynan syrt Reseı, О́zbekstan, Tájikstan, Qyrǵyzstan, Túrkııa, Majarstan, Aýǵanstan, Mońǵolııa eliniń kókparshylary dodaǵa kirdi. 17–19 naýryz aralyǵynda irikteý saıysyn ótkizgen qatysýshylar búgin jartylaı fınaldyq tartysty bastaıdy.
Búkilálemdik kókpar qaýymdastyǵynyń prezıdenti Danııar Qobylandınniń aıtýynsha, 11 elge saýyn aıtylyp shaqyrtý jiberilgen. Dodaǵa qatysýshylarǵa barlyq jaǵdaı jasalyp, sheteldik komanda ókilderine jaraý arǵymaqtar berilgen.
Kókpardan álem chempıonaty jańa erejemen ótip jatyr. Dodanyń bas tóreshisi Janysbek Saev eki topqa bólingen komandalar irikteý kezeńinde tartysqa túsip, fınaldyq kezeńge birinshi, ekinshi oryn alǵan komandalar shyǵatynyn atap ótti. Buǵan deıin uıymdastyrylǵan doda kezinde komanda irikteýde bir ret jeńilse, fınalǵa ótpeıtin. Keıingi ereje jumsartylyp, toptyq kezeńde bir ret jeńilgen komandaǵa da fınaldyq tartysqa múmkindik berilip otyr. Sodan bolar, álem chempıony ataǵynan árkim de dámeli.
Qytaı quramasyn alańǵa bastap shyqqan Nurbolat Tálipbaıuly jyldan-jylǵa kókpar oıynyna qyzyǵýshylyq artyp kele jatqanyn jetkizdi.
– Qarsylas komandalardyń da áleýeti joǵary. Dese de Qazaq eliniń ulttyq quramasy tegeýrindi ekenin bilemiz. Buǵan deıin san márte tartysqa tústik, syralǵy kókparshylar kópshiligi. Biz dodaǵa jergilikti qylquıryqty minip tartysqa túsemiz. Arǵymaqtardyń ekpini kúshti eken, birte-birte sáıgúlikterdiń syryna boı úıretip kelemiz. Álem chempıonaty joǵary deńgeıde uıymdastyrylyp jatyr, – deıdi kókparshy.
Bir aptaǵa ulasatyn álem chempıonatynyń júlde qory – 30 mıllıon teńge.
Ulttyq sport kúnine oraı Túrkistan shaharynda taǵy bir dúbirli doda jalaýyn jelbiretti. Asyq atýdan bastalǵan álem kýbogi erteń máresine jetedi. Tól oıynymyzdy úırengen qatysýshylar álemniń ár qıyrynan kelip mergendigin synap jatyr. Týrızm jáne sport mınıstrliginiń Sport jáne dene shynyqtyrý isteri komıteti, Ulttyq asyq atý federasııasy men Túrkistan oblysynyń ákimdigi uıymdastyrǵan saıystyń ataǵy jer jaryp tur. Buǵan deıin tek ulttyq oıyn dárejesinde nasıhattalyp kelgen asyq atý keıingi jyldary sport mártebesin alyp, resmı federasııa quryldy. Ilkimdi isterdiń nátıjesinde álemdik dodalar da uıymdastyrylyp keledi.
Týrızm jáne sport mınıstrliginiń málimetinshe, naýryznama onkúndiginde elimizde 747 sporttyq-buqaralyq is-shara ótedi. Ulystyń uly kúnine oraı uıymdastyrylatyn jarystarǵa shamamen 150 myń adam qatyspaq. Is-sharalar barlyq óńirdi qamtyp, aýyldyq okrýgterden bastap aýdan, qala jáne oblys ortalyqtaryn da qamtıdy.
Baǵdarlamaǵa negizinen qazaq halqynyń dástúrleri men mádenı murasyn dáripteıtin ulttyq sport túrleri engizilgen. Atap aıtqanda, qazaq kúresi, asyq atý, jamby atý, toǵyzqumalaq, sadaq atý, qusbegilik, aýdaryspaq, kókpar, teńge ilý syndy saıys túrlerinen jarysady. Sonymen qatar meıram aıasynda halyq oıyndary men sport jarystary da ótkiziledi. Olardyń ishinde: qoı kóterý, jilik syndyrý, láńgi tebý, arqan tartý, alyptar saıysynyń da qyzyǵy mol. Sporttyq is-sharalar birneshe óńirde josparlanǵan, bul halyqtyń Naýryzdy merekeleýi joǵary ekenin aıqyndaı tússe kerek.