Burnaǵy kúni Astanada hokkeıden Qazaqstan Prezıdentiniń Kýbogy úshin ótken VI halyqaralyq týrnır máresine jetti. Fınalda Vladıvostoktyń «Admıralyn» 3:2 esebimen jeńgen Astananyń «Barysy» jarys jeńimpazy atandy. Saıys jańadan ashylǵan muz saraıynda uıymdastyryldy.
Fınaldyq báseke teń jaǵdaıda órbidi. Alǵashqy kezeńde birneshe tamasha múmkindikter bolǵanymen, esep ashylǵan joq. Al kezdesýdiń ekinshi jartysynda jankúıerler tórt birdeı shaıbanyń kýási boldy. Aldymen aıdyn ıeleri esep ashty. Bul kezdesýdiń 21-mınýty bolatyn. Arada 4 mınýt ýaqyt ótkende, qonaqtar tarazy basyn teńestirdi.
Ekinshi úziliske deıin qarsylastar taǵy da bir-birden shaıba engizdi. Úshinshi kezeńde tablodaǵy esep ózgergen joq. Al over-taımda «Barystyń» joly boldy. 63-mınýtta Roman Starchenko jeńis shaıbasyn soǵyp, komandasyna Prezıdent Kýbogyn alyp berdi. Marapattaý rásimine Premer-Mınıstr Kárim Másimov, Mádenıet jáne sport mınıstri Arystanbek Muhamedıuly, «Nur Otan» partııasynyń hatshysy Qumar Aqsaqalov jáne Qazaqstan hokkeı federasııasynyń prezıdenti Asqar Mamın qatysty. Aıta keteıik, týrnırde tórt komanda synǵa tústi. «Barys» alǵashqy oıynda Novokýzneskiniń «Metallýrgin» 4:2 esebimen jeńse, ekinshi kezdesýinde Hanty-Mansıısk qalasynan kelgen «Iýgra» komandasyna 1:2 esebimen ese jiberdi. Al úshinshi oıynda «Admıraldan» 2:1 esebimen basym túsip, jarystyń fınalyna joldama aldy. Atalǵan saıysta júldeli úshinshi oryn «Iýgraǵa» buıyrdy. Qola medal úshin bolǵan oıynda ol «Metallýrgti» 1:0 esebimen jeńdi.
Elaman QOŃYR, «Egemen Qazaqstan».