Elordalyq oqýshy Batyrhan Muhtarhan ekonomıka jáne qarjy boıynsha respýblıkalyq olımpıadada absolıýtti jeńimpaz atandy. Astana halyqaralyq qarjy ortalyǵynda ótken bilim dodasynyń fınaldyq kezeńine elimizdiń barlyq óńirinen iriktelgen 115 oqýshy qatysyp, 50 júlde sarapqa salynǵan edi. Sol úzdikterdiń qatarynan sýyrylyp shyqqan Batyrhan bul joly da óziniń alǵyrlyǵyn taǵy bir márte dáleldedi.
Batyrhan – Nazarbaev zııatkerlik mektebiniń 11-synyp oqýshysy. Ol buǵan deıin de halyqaralyq deńgeıde el namysyn abyroımen qorǵap júrgen daryndy oqýshylardyń biri. Atap aıtqanda, 2024 jyly Gonkongte ótken Ekonomıkadan halyqaralyq olımpıadada qola medal ıelense, 2025 jyly Ázerbaıjandaǵy saıysta altyn medal jeńip aldy. Sonymen qatar Grekııada ótken EO-2025 halyqaralyq olımpıadasynda absolıýtti jeńimpaz atanyp, álemdik deńgeıde myqtylyǵyn kórsetti.
Jas darynnyń aıtýynsha, tabysqa jetýdiń kilti – júıeli daıyndyq. Ol arnaıy oqýlyqtardy konspektileý, halyqaralyq qarjy mamandary keń qoldanatyn CFA júıesine súıený kóp kómekteskenin aıtady. Osyndaı tásil kúrdeli taqyryptardy tereńirek túsinýge jol ashqan.
Ekonomıka men qarjyǵa qyzyǵýshylyǵy birden qalyptasa qoımaǵan. Batyrhan túrli jarys kezeńinen ótip, arnaıy daıyndyq ortalyqtarynda oqı júrip, bul ǵylymnyń álemdik mańyzdy máselelerge jaýap bere alatyn aýqymdy sala ekenin túsingen. Sol sátten bastap osy baǵytqa shyndap den qoıǵan.
Ol óz qatarlastaryna aǵylshyn tilin jetik meńgerýdi, ýaqytty bosqa shyǵyndaıtyn dúnıelerdi shekteýdi, bilimdi júıelep oqýdy usynady.
Absolıýtti jeńimpaz ataný – ekiniń birine buıyra bermeıtin jetistik. Mundaı nátıje tereń bilimmen qatar, tabandylyqty, udaıy izdenisti jáne básekeli ortada shyńdalýdy talap etedi. Batyrhan sekildi talapty jastardyń jetistigi óz qatarlastaryna da úlgi. О́ıtkeni bilim men tártipti serik etken jas órender erteń el ekonomıkasyn jańa deńgeıge kóteretin býynǵa aınalmaq.