Qazir óńirlerde ınklıýzıvti sport ınfraqurylymdary jetkiliksiz. Buǵan qosa beıimdi sport salasynda bilikti kadrlar tapshy, qajetti biryńǵaı tásilder men jumys ádistemeleri joq. Keshe Senat janyndaǵy Inklıýzııa jónindegi keńestiń kezekti otyrysynda depýtattar osy máseleni kóterdi. Olar salalyq uıymdardyń sarapshylarymen birlesip, múgedektigi bar balalar men eresekterdi ońaltý jolynda ınklıýzıvti sportty damytýdyń mańyzyn talqylady.
«Dene shynyqtyrý men sport – áleýmettik ońaltý jáne ınklıýzııa tetigi» taqyrybyna arnalǵan jıyndy Senat tóraǵasy Máýlen Áshimbaev ashyp, jańa Konstıtýsııada adam quqyqtary men bostandyqtary memlekettiń eń joǵary basymdyǵy retinde aıqyndalǵanyn atap ótti. Sondaı-aq ol Prezıdent Qasym-Jomart Toqaev ınklıýzıvti qoǵam qalyptastyrýǵa jáne árbir azamatqa óz áleýetin tolyq iske asyrýyna qajetti jaǵdaı jasaýǵa erekshe mán berip otyrǵanyn aıtty.
Sonymen qatar Palata spıkeri Memleket basshysynyń tapsyrmasymen salynǵan Inklıýzıvti sport ortalyǵynyń biregeı mańyzyna toqtalyp, atalǵan nysanda azamattarǵa jan-jaqty qoldaý, jattyǵý men ońaltýdan bastap, emdeý men oqytýǵa deıingi aýqymdy qyzmet kórsetiletinin aıtty.
«Inklıýzıvti qoǵamdy damytý máseleleri – Prezıdent Qasym-Jomart Toqaev júrgizip otyrǵan saıasattyń basym baǵyttarynyń biri. Bilim berý, sport jáne áleýmettik salada ınklıýzııany qoldaý qaǵıdaty – árbir azamatqa óz áleýetin tolyq júzege asyrýǵa múmkindik beretin Ádiletti Qazaqstan qurý strategııasynyń ajyramas bóligi. Osy oraıda múmkindigi shekteýli jandar arasynda ınklıýzıvti sport pen dene shynyqtyrý ıdeologııasyn belsendi dáripteý – Memleket basshysy júktegen mańyzdy mindetterdiń biri. Sondyqtan bárimiz birlesip, qolǵa alynǵan jumysty júıeli túrde jalǵastyryp, naqty nátıjelerge qol jetkizýimiz qajet», dep M.Áshimbaev ótken Paralımpıada oıyndarynda jeńiske jetken otandyq paraatletterdiń jetistikterine joǵary baǵa berdi.
Otyrys barysynda elimizde ınklıýzıvti sportty damytý baǵytynda oń dınamıka qalyptasqany da aıtyldy. Sarapshylar keltirgen derekterge sáıkes, búginde elimizde osy salaǵa beıimdelgen 16 klýb pen 2 mamandandyrylǵan sport mektebi jumys isteıdi. Onda qazir 8 myńǵa jýyq erekshe qajettiligi bar sportshy turaqty túrde jattyǵady. Sonymen qatar Senat tóraǵasy kún tártibindegi máselelerdi talqylaý kezinde saladaǵy birqatar júıeli problemaǵa da toqtaldy.
Kezdesýge qatysýshylardyń aıtýynsha, bul saladaǵy qordalanǵan máselelerdi sheshýge medısına, bilim berý men áleýmettik qorǵaý salalarynyń ókilderi barlyq múddeli taraptarmen birlesip úılesimdi jumys atqarýy qajet. Osy oraıda Senat spıkeri qazir depýtattar múmkindigi shekteýli balalardy qoldaýdy arttyrýǵa arnalǵan birqatar zańnamalyq túzetý ázirlep jatqanyn atap ótti.
Sondaı-aq M.Áshimbaev ınklıýzııa zańnamalyq tetikter arqyly ǵana emes, sonymen qatar mádenıet, otbasy men mekteptegi dáripteý jumystary arqyly da qalyptasatynyn aıtty. Bul baǵytta áli de aýqymdy jumys atqarylýǵa tıis ekenin aıtqan Senat tóraǵasy osy iske Qazaqstan bochcha federasııasy uıytqy bolǵan jáne Kinopark kompanııasymen birlesip túsirilgen «Erekshe» fılmi tyń serpin bergenin jetkizdi. Aıta ketsek, atalǵan fılm 19 naýryzdan bastap prokatqa shyqty.
Otyrysta depýtattarmen qatar Senat janyndaǵy Inklıýzııa jónindegi keńestiń tóraǵasy Lázzat Qaltaeva, Oqý-aǵartý mınıstriniń birinshi orynbasary Maıra Meldebekova, Týrızm jáne sport vıse-mınıstri Serik Jarasbaev, «Ski Park Pioneer» JShS dırektory Janat Qarataı, sondaı-aq Dúnıejúzilik densaýlyq saqtaý uıymynyń ókilderi, Senat janyndaǵy Sarapshylar klýbynyń músheleri men basqa da qatysýshylar sóz sóıledi. Keńeste aıtylǵan barlyq usynys pen bastama muqııat zerdelenip, jumysta eskerý úshin tıisti memlekettik organdarǵa joldanady.