Taraz qalasyndaǵy jeke mekteptiń 11-synyp oqýshysy sot arqyly óz ákesinen alıment óndirip aldy. Aı saıyn 68 myń teńge kóleminde oqý aqysyn tóleıtin qyz uzaq jyldar boıy ómirine aralaspaǵan jáne materıaldyq qoldaý kórsetpegen ákesinen zań júzinde kómek alýǵa májbúr bolǵan, dep habarlaıdy Egemen.kz.
2008 jyly ákesi eki balasynan, sonyń ishinde qyzyna da qatysty ata-ana quqyǵynan notarıaldy túrde bas tartqan. Al 2018 jyly otbasynda qaıǵyly jaǵdaı bolyp, anasy men aǵasy qaza tapqannan keıin, qyz ájesiniń qolynda turyp kelgen. Osy ýaqytqa deıin ákesi eshqandaı kómek kórsetpegen, kerisinshe baılanystan qashyp, qyzy habarlasýǵa tyrysqanda telefon nómirin buǵattap tastaǵan.
Qarjy jaǵdaıynyń aýyrlyǵyna baılanysty mektep oqýshysy sotqa júginip, alıment óndirýdi talap etti. Barlyq shyǵyndar ájesiniń moınynda bolǵandyqtan, qarajat tek kúndelikti qajettilikke ǵana jetken.
Alıment júıesin retteıtin zań maquldandy
Sot otyrysynda ákesi talapty ishinara qanaǵattandyrýdy surap, basqa nekeden tórt balasy bar ekenin jáne nesıelik mindettemelerin alǵa tartty. Alaıda sot onyń birneshe kásipten tabys tabatynyn jáne eńbekke qabiletti ekenin anyqtady.
Sonymen qatar, sot sheshimi shyqqan kúni onyń jeke kásipker retinde tirkeýden shyqqany jáne buǵan deıin taǵy tórt balanyń ákeligin resmı moıyndaǵany belgili boldy. Sot bul áreketterdi alıment mólsherin ádeıi azaıtý áreketi dep baǵalady.
Nátıjesinde Taraz qalalyq soty ony qyzyna oqýyn aıaqtaǵanǵa deıin aı saıyn 17 aılyq eseptik kórsetkish (66 844 teńge) kóleminde alıment tóleýge mindettedi.
Atyraýda alıment tólemegenderdiń bereshegi 3 mlrd teńgeden asqan
Apellıasııalyq shaǵym nátıje bermedi, Jambyl oblystyq soty sheshimdi ózgerissiz qaldyrdy.
Úkim zańdy kúshine endi.