Keshe Astanada Mádenıet jáne sport mınıstri Arystanbek Muhamedıuly qatysqan sport kúnin merekeleýge arnalǵan saltanatty jıyn ótti. Oǵan respýblıkalyq sport uıymdarynyń jetekshileri men ókilderi, sport ardagerleri jáne taǵy basqa sala mamandary qatysty.
Shara barysynda vedomstvo basshysy baıandama jasap, elimizdiń sporttaǵy qazirgi ahýalyna toqtaldy.
– Búginde respýblıkada 125 kásibı sport klýby jumys isteıdi. Onda 35 myń adamǵa deneshynyqtyrý jáne sportpen shuǵyldanýǵa jaǵdaı jasalǵan. Sondaı-aq, 3,3 mln. adamdy qamtıtyn 92,5 myń sport seksııasy bar. Osy rette aýyl turǵyndarynyń sany 1,6 mln. adam ekenin erekshe aıtyp ótken jón. Jalpy, qazirgi tańda elimizde 4 mln. 300 myń adam ártúrli sport saıystaryna belsendi qatysyp, turaqty salamatty ómir saltyn ustanady. Bul kórsetkish el halqynyń 25,1 paıyzyn quraıdy, – dedi mınıstr. Sonymen qatar, Arystanbek Muhamedıuly «100 naqty qadam» Ult josparyn júzege asyrý sheńberinde mınıstrlik sportty damytýǵa baǵyttalǵan qujattar toptamasyn ázirlegendigin aıtty. Jıyn sońynda mınıstr barsha qatysýshylardy sport kúnimen quttyqtap, osy salada úzdik isimen kózge túsken bir top mamandy marapattady. Atap aıtqanda, «Qurmetti sport qyzmetkeri» jáne «Deneshynyqtyrý men sportty damytýǵa sińirgen eńbegi úshin» tósbelgilerimen, sondaı-aq, Alǵys hattarmen 30-ǵa jýyq maman marapattaldy. Aıta keteıik, «Qazaqstan Respýblıkasyndaǵy kásibı jáne ózge de merekeler týraly» Qazaqstan Respýblıkasy Prezıdentiniń 1998 jylǵy 20 qańtardaǵy №3827 Jarlyǵyna sáıkes tamyz aıynyń úshinshi jeksenbisi sport kúni dep bekitilgen.
Elaman QOŃYR, «Egemen Qazaqstan».