Jekelegen sa-ıysta Iýlııa Pýtınseva Kaıla Krossty qapy qaldyrsa, Sonıa Jıenbaeva Bıanka Andreeskýge jol berdi. Odan keıin Jibek Qulambaeva men Anna Danılına juby Kross pen Andreeskýden aılasyn asyrdy. Asa shıelenisti ótken sheshýshi oıynda Iý.Pýtınseva kezinde US Open dodasynda dara shyqqan álemniń burynǵy úshinshi raketkasy Andreeskýdi utty. 3 saǵat 39 mınýtqa sozylǵan kezdesý 7:6, 3:6, 7:6 esebimen aıaqtaldy.
Elimizdiń kórkem gımnasshylary Tashkentte uıymdastyrylǵan Álem kýboginiń toptyq básekesinde ekinshi oryndy enshiledi. Quramynda Jasmın Júnisbaeva, Aıda Hakimjanova, Krıstına Chepýlskaıa, Mádına Myrzabaı, Aızere Keńes, Aızere Nurmaǵambetova syndy arýlary bar komanda 51,25 upaı jınady. Jerlesterimiz Qytaıdan (55,90 upaı) ǵana qalyp qoıdy. Úshinshi oryndy Belarýs (51,10) ıeledi.
Kıprdegi «Úmitkerler týrnıriniń» 11-týrynda Bıbisara Asaýbaeva qytaılyq Tan Chjdýnımen teń oınady. Kelesi týrda qazaq shahmatshysynyń joly jarys kestesinde ózimen qatar turǵan reseılik Ekaterına Lagnomen qıysty. Bul básekede Bıbisara basym tústi. Osy jeńisiniń arqasynda 6,5 upaı jınap, úshinshi orynǵa kóterildi. Kóshbasyndaǵy úndistandyq Rameshbabý Vaıshalı men qytaılyq Chjý Szınerdiń Asaýbaevadan jarty upaıy artyq.
Horvatııanyń Osıek qalasynda sporttyq gımnastıkadan Álem kýbogi aıaqtaldy. «At» jattyǵýynda Zeınolla Ydyrysov (14,600) kúmis alsa, Narıman Qurbanov (14,000) qolaǵa qol sozdy. Bas júldeni armenııalyq Gamlet Manýkıan (14,733) oljalady. «Kerme» jattyǵýynda Mılad Karımı (14,933) tek taıpeılik Tang Chıa-Hýndy (15,233) alǵa salyp, ekinshi orynǵa ıe boldy.
Voleıboldan áıelder arasyndaǵy Ulttyq lıga oıyndary márege jetti. Astanada ótken fınaldyq matchta Taldyqorǵannyń «Jetisýy» men Petropavldyń «Qýanyshy» kezdesti. Sheshýshi báseke 3:1 (25:13, 25:21, 21:25, 25:21) esebimen alǵashqylardyń paıdasyna sheshildi. Sóıtip, «Jetisý» onynshy ret el chempıony atandy. Qola medaldy Túrkistannyń «Turany» ıelendi.
Almatyda aralas jekpe-jekten IBA Nomad 14 týrnıri ótti. Basty básekede Juman Jumabekov brazılııalyq Vanderleı Rosany úshinshi raýndta nokaýtqa jiberdi. Kópshiliktiń qyzyǵýshylyǵyn týdyrǵan taǵy bir aıqas Arman Áshimov pen tájikstandyq Dılshod Norkýzıev arasynda órbidi. Qandasymyzǵa Pamır taýy eteginen kelgen sportshyny uryp jyǵýǵa bir raýnd jetkilikti boldy. Kezinde UFC-de kúsh synasqan Jalǵas Jumaǵulov ta qyrǵyz Qaırat Nurbaıulymen bolǵan básekeniń taǵdyryn úziliske jetkizbeı sheshti.
Fýtboldan el chempıonatynyń besinshi týry mynadaı nátıjemen aıaqtaldy: «Atyraý» – «Qaısar» 2:0, «Jetisý» – «Elimaı» 0:1, «Tobyl» – «Qaırat» 1:1, «Astana» – «Ordabasy» 1:1, «Oqjetpes» – «Ertis» 2:1, «Altaı» – «Ulytaý» 1:2, «Qyzyljar» – «Jeńis» 4:0, «Aqtóbe» – «Kaspıı» 1:0. Qazir jarys kestesinde úsh komanda – «Qaırat», «Elimaı», «Oqjetpes» kósh bastap tur. Olardyń árqaısysynda 11 upaıdan bar.