Semeı qalasynyń Shyǵys kentinde «Keleshek mektepteri» ulttyq jobasy aıasynda salynǵan №53 jalpy orta bilim beretin 300 oryndyq mektep paıdalanýǵa berildi. Ashylý saltanatyna oblys ákimi Berik Ýálı, Oqý-aǵartý vıse-mınıstri Jaıyq Sharabasov, Qazaqstannyń Eńbek Eri, ustaz Alma Shúkijanova, Parlament Senatynyń depýtattary Qaırat Tastekeev, Aınur Arǵynbekova, Parlament Májilisiniń depýtattary Rınat Zaıytov, Maqsat Tolyqbaı qatysty.
Shyǵys kentiniń balalary endi eńseli de zamanaýı ǵımaratta bilim alady. Bul – «Keleshek mektepteri» jobasy sheńberinde boı kótergen Semeı qalasyndaǵy úshinshi, al Abaı oblysy boıynsha besinshi mektep. Jańa bilim ordasy zamanaýı talaptarǵa saı salynǵan. Jalpy aýmaǵy 2,56 gektardy quraıdy, 300 oqýshyǵa arnalǵan. Mektepte 30 oqý kabıneti, 2 ınformatıka synyby, robottehnıka kabıneti, hımııa, fızıka jáne bıologııa pándik zerthanalary bar. Sondaı-aq tokarlyq jáne metall óńdeý sheberhanasy, aspazdyq jáne tigin bólmeleri qarastyrylǵan.
Mektep 17 ınteraktıvti panelmen jabdyqtalǵan, 84 oryndyq májilis zaly, 78 oryndyq ashana, oqý zaly men kitaphana jumys isteıdi. STEM-zerthanalar, horeografııa zaly, 673 sharshy metrlik sport zaly, oıyn alańdary bar. Mektep aýmaǵynda fýtbol, voleıbol, hokkeı alańdary men 400 metrlik júgirý joly qarastyrylǵan.
Erekshe bilim berýdi qajet etetin balalarǵa da barlyq jaǵdaı jasalǵan. Ǵımaratta lıft, taktıldi joldar ornatylǵan. Is-sharada óńir basshysy ustazdar, oqýshylar men ata-analardy mańyzdy oqıǵamen quttyqtady.
«Búgin – oblysymyzdyń áleýmettik salasyndaǵy mańyzdy kún. Memleket basshysy Qasym-Jomart Toqaevtyń tapsyrmasymen qolǵa alynǵan «Keleshek mektepteri» ulttyq jobasy aıasynda Shyǵys kentindegi jańa bilim oshaǵyn el ıgiligine tabystap otyrmyz. Joba sheńberinde oblysymyzda jalpy syıymdylyǵy 3000 oryndyq 5 zamanaýı mekteptiń qurylysy tolyq aıaqtaldy. Bul nysannyń tehnıkalyq jaraqtalýy tıptik mektepterden 4 ese joǵary, al ǵımarat aýdany 20 paıyzǵa keń etip josparlanǵan. Osy mektepti iske qosý arqyly Shyǵys kentindegi memlekettik mektepke qatysty ózekti máseleni tolyq sheshtik. Endi oqýshylardyń basqa aýdandarǵa qatynaýynyń qajeti joq. О́ńirdegi balalardyń sapaly bilim alýy men ustazdardyń tıisti jaǵdaıda jumys isteýi barysynda júıeli qoldaý kórsetýdi jalǵastyra beremiz. Jańa bilim ordasy qutty bolsyn!» dedi Berik Ýálı.
Is-shara barysynda Oqý-aǵartý vıse-mınıstri Jaıyq Sharabasov óńirdiń bilim salasyna uzaq jyl boıy eńbek sińirgen ardager ustazdary Marııama Bıtebaeva men Baqyt Qajybaevaǵa «Eńbek ardageri» medalin tabys etti. Oblys ákimi qurmetti qonaqtarmen birge mekteptiń synyptaryn aralap, oqýshylarmen, muǵalimdermen pikirlesti.
«Bul bilim ordasynyń Shyǵys kentiniń dál osy aımaǵynda ashylýy balalarymyzǵa da, bizge de zor qýanysh. Sebebi balalarymyz mektepke alysqa qatynap, qıyndyq kórip, úıirmelerge durys bara almaı júrgen edi. Shyǵys kentiniń oń jaǵalaýynda turatyn oqýshylardyń kópten kútken armany oryndaldy. Jarqyraǵan, zamanaýı oqytý quraldarymen jabdyqtalǵan bilim ordasy el bolashaǵyna jasalyp jatqan ınvestısııa deýge bolady. Ata-analar atynan rızashylyǵymyzdy bildirip, alǵysymyzdy aıtamyz», dedi Shyǵys kentiniń turǵyny Shalqar Hamılaev.
Qazir oblysta mektep tapshylyǵyn sheshýde júıeli jumys júrgizilip jatyr. Jarma aýdanynyń Sýyqbulaq aýylyndaǵy bastaýysh mektepti jańa oqý jylynda paıdalanýǵa berý josparlanǵan. Semeı qalasyndaǵy №4, №30 mektepterge qosymsha ǵımarattar salynyp, Abaı aýdany Keńgirbaı bı aýylyndaǵy Qarashoqy shatqalynda balalar lageriniń qurylysy aıaqtalýǵa jaqyn. Sonymen qatar aldaǵy jyldary Semeıdiń Qaraǵaıly shaǵyn aýdanynda 400 oryndyq «Bilim-ınnovasııa» lıseıin, 1400 oryndyq mektep pen Aqsýat jáne Ekpin aýyldarynda 300 oryndyq eki mektep salý josparlanyp otyr.
Abaı oblysy