Qazaq óneriniń kóginde taǵy bir jarqyn juldyz janýǵa ázir. Dástúr men jańashyldyqty toǵystyrǵan, rýh pen sheberlikti tarazyǵa salǵan halyqaralyq vokaldyq baıqaý – Roza Baǵlanova atyndaǵy óner dodasy bıyl da keń tynyspen qanat jaıdy.
Mádenıet jáne aqparat mınıstrliginiń qoldaýymen ótip jatqan aıtýly joba ekinshi jyl qatarynan ónersúıer qaýymnyń nazaryn ózine aýdaryp otyr. Bıylǵy baıqaýǵa 150 úmitkerdiń ótinim berýi – sonyń aıqyn dáleli. Bul – tek sannyń kórsetkishi emes, sapanyń, senimniń hám shyǵarmashylyq básekeniń jańa beleske kóterilgeniniń kórinisi.
Baıqaý shekara talǵamaıdy. Qazaq dalasynan bastaý alǵan áýezdi óner dodasyna Túrkııa, Belarýs, О́zbekstan, Qyrǵyzstan elderinen de talantty jastar ún qosyp, ónerdiń ortaq til ekenin taǵy bir márte dáleldep otyr. Sáýirdiń 8-inde ótinim qabyldaý kezeńi támamdalyp, qazir qatysýshylar irikteý synynan ótip jatyr. Onlaın formatta ótip jatqan alǵashqy kezeń – talant pen daıyndyqtyń synalar shaǵy. Bul kezeńde árbir qatysýshynyń daýys múmkindigi ǵana emes, sahna mádenıeti, oryndaýshylyq sheberligi de jan-jaqty sarapqa salynady. Al mamyrdyń 13-inde ótetin oflaın kezeń – naǵyz óner merekesine aınalmaq. Irikteýden súrinbeı ótken úmitkerler úlken sahnada baq synap, kórermen júregin baýraýǵa tyrysady. Baıqaýdyń sheshýshi kezeńi – 14 mamyr. Osy kúni ótetin Gala-konsertte jeńimpazdar esimi jarııalanyp, úzdikterdiń óneri kópshilikke jol tartady.
Aıtýly joba – ulttyń rýhanı murasyn ulyqtaıtyn, Roza Baǵlanova syndy dara tulǵanyń ónerdegi ólmes izin keıingi býynǵa amanattaıtyn taǵylymdy alań. Halyq qaharmanynyń esimimen atalýynyń ózi baıqaýdyń mazmunyn tereńdetip, mańyzyn arttyra túsedi. О́nerdiń órisin keńeıtip, talanttyń tamyryn tereńge tartqan bul bastama – ulttyq mádenıettiń mereıin ósiretin mańyzdy qadam. Baıqaýdy uıymdastyryp otyrǵan «Qazaqkonsert» ujymy osy arqyly jas daryndarǵa úlken múmkindik usynyp otyr.