Kıprdiń Pafos qalasynda «Úmitkerler týrnıri» aıaqtaldy. Osyndaı bedeli zor, mártebesi joǵary jarysqa elimizdiń ókili tuńǵysh ret qatysty. Jerorta teńiziniń jaǵalaýynda 22 jastaǵy Bıbisara Asaýbaeva tabysty óner kórsetip, jer-jahan jankúıerlerin asqan sheberligimen tamsandyrdy.
Alǵashqy eki kezdesýde Bıbisara Asaýbaeva (FIDE reıtınginde 2 516 upaıy bar) Rameshbabý Vaıshalı (Úndistan, 2 470), Aleksandra Gorıachkınamen (Reseı, 2 534) teń tústi. Úshinshi týrda álemdik reıtıngte ekinshi orynda turǵan qytaılyq Chjý Szınerdi (2 578) jeńip, sensasııalyq nátıje tirkedi. Kóp keshikpeı álemniń eks-chempıony Tan Chjýnımen (Qytaı, 2 534) upaı bólisti. Besinshi, altynshy týrlarda Asaýbaeva sátsiz óner kórsetip, Ekaterına Lagno (Reseı, 2 508) men Dıvııa Deshmýkhqa (Úndistan, 2 497) ese jiberdi. Osy sátsizdiktiń saldarynan jerlesimiz jarys kestesindegi jaǵdaıyn kúrt nasharlatyp, jetinshi orynǵa syrǵyp tústi. Jetinshi týrda Anna Mýzychýkpen (Ýkraına, 2 522) sheberlik baıqasty. Bul básekede jeńimpaz anyqtalmady.
Ekinshi kezeń bastalǵan tusta joǵarydaǵy jaǵdaı aına-qatesiz qaıtalandy. Alǵashqy aınalymdarda Vaıshalı, Gorıachkınamen teń oınaǵan Bıbisara 10-týrda Szınerdi taǵy da utty. Odan keıin Chjýnımen upaı bólisti. 12, 13-týrlarda qarqynyn kúrt kúsheıtken qandasymyz Lagno men Mýzychýkti utyp, upaı sanyn 7,5-ke jetkizdi. Osy jeńisteriniń arqasynda Bıbisara osyǵan deıin jeke-dara kósh bastap turǵan Vaıshalı Rameshbabýdy qýyp jetip, birinshi, ekinshi oryndy ózara bólisip turdy.
Birinshi orynnyń bási sońǵy týrda sheshildi. Bıbisara Deshmýkhmen sheberlik baıqasyp, teń tústi. Al jerlesimizdiń basty qarsylasy Rameshbabý Vaıshalı Ekaterına Lagnodan aılasyn asyrdy. Nátıjesinde, B.Asaýbaeva 8 upaımen, ekinshi oryndy qanaǵat tutty. Osy jarys barysynda 14 kezdesý ótkizgen ol tórt ret jeńiske jetip, eki ret utyldy. Jeti oıynda jeńimpaz anyqtalǵan joq. Qalaı degende de B.Asaýbaeva bul týrnırde sátti óner kórsetti. Kileń myqtylar bas qosqan básekede ekinshi oryn alý – asa joǵary kórsetkish. Sol turǵyda jastaıynan-aq álemdik dodalarda top jarǵan, blısten (shapshań shahmat) úsh dúrkin álem chempıony degen ataǵy bar qaısar minezdi qazaq qyzynyń bolashaǵy alda dep senemiz.
Bıbisaradan bar-joǵy jarty upaı artyq jınaǵan Vaıshalı «Úmitkerler týrnıriniń» jeńimpazy atandy. Endi úndistandyq shahmatshy búginde tórtkúl dúnıeniń teńdessizi dep tanylyp otyrǵan qytaılyq Szıýı Venszıýnmen chempıondyq tájge talasady.
Jarystyń júlde qory bıyl 300 000 eýrony qurady. Bas júldeni oljalaǵan shahmatshy 28 000-dy ıelense, ekinshi oryn alǵan oıynshy 17 000-dy enshiledi. Úzdik úshtikti túıindegen burymdy 8 600 eýrony ámııanyna saldy.
Erler arasyndaǵy jarys Javohır Sındarovtyń jarqyn jeńisimen aıaqtaldy. Týrnırdiń aıaqtalýyna bir týr qalǵanda ózbekstandyq grossmeısterdi endi eshkimniń qýyp jete almaıtyny belgili boldy. Kıprde ol germanııalyq Mattıas Blıýbaým, úndistandyq Rameshbabý Pragnanandha, amerıkalyq Fabıano Karýana men Hıkarý Nakamýra, nıderlandyq Anısh Gırı, qytaılyq Veı I, reseılik Andreı Esıpenko syndy sańlaqtardyń aldyn orap ketti. Javohır 14 kezdesýde 10 upaı jınap, rekordtyq nátıje kórsetti. Endi 20 jastaǵy ózbektiń asa daryndy shahmatshysy álem chempıony, úndistandyq Gýkesha Dommaradjýmen chempıondyq tájdi sarapqa salady.