Foto: Ashyq derekkóz
Sınoptıkterdiń málimetinshe, maýsym aıynda eldiń basym bóliginde kún ádettegiden jyly bolady. Al shyǵys óńirlerde jáne soltústik-batystyń shetki aımaqtarynda temperatýra qalypty deńgeıde saqtalady. Kúndiz aýa temperatýrasy +30...+38 gradýstan +15...+20 gradýsqa deıin qubylyp turady. Ońtústikte keı kúnderi aptap ystyq +45 gradýsqa deıin jetedi.
Sonymen qatar ystyq kúnderdi salqyn aýa raıy almastyryp, nóser jańbyr, naızaǵaı, burshaq jáne ekpindi jel boljanǵan. Eldiń soltústigi men shyǵysynda, sondaı-aq ońtústik-shyǵystaǵy taýly aımaqtarda 10 maýsymǵa deıin túngi jáne tańǵy ýaqytta úsik júrýi múmkin.
Sınoptıkterdiń málimetinshe, shilde aıy birqalypty ystyq bolady. Temperatýra eldiń basym bóliginde +18...+24 gradýs, ońtústikte +25...+30 gradýs, al ońtústik-shyǵys pen shyǵystyń taýly óńirlerinde +9...+17 gradýs shamasynda bolady.
Tamyz aıynda Qazaqstannyń basym bóliginde ystyq aýa raıy kútiledi. Temperatýra klımattyq normadan 1-2 gradýsqa joǵary bolady.
«Qazgıdromet» mamandary jaz mezgilindegi jaýyn-shashyn kólemi jalpy alǵanda qalypty deńgeıde dep boljap otyr. Alaıda jaýyn mólsheri maýsymda – ońtústik-batysta, soltústik pen ortalyqtyń keı aýdandarynda, shildede – batys, ońtústik-batys, ońtústik jáne ońtústik-shyǵysta, tamyzda – ońtústik-batys, ortalyq jáne ońtústik pen shyǵystyń keı aımaqtarynda qalypty mólsherden az bolýy múmkin.
Sınoptıkter maýsymdyq boljamnyń aldyn ala keńes sıpatynda jasalatynyn, ıaǵnı naqty emes ekenin eske saldy. Keıin ol aılyq, onkúndik, aptalyq jáne táýliktik naqty boljamdarmen tolyqtyrylyp otyrady.
Aıta keteıik, aldaǵy demalys kúnderi elimizdiń basym bóliginde aptap ystyq bolady.
