Indonezııada jeksenbi kúni radardan joǵalyp ketken «Tringana Air Service» avıakompanııasy ushaǵynyń synyqtary tabyldy. Bul jóninde «Reıter» agenttigi eldiń kólik mınıstrligi ókiliniń aıtqandaryna silteme jasaı otyryp habarlady.
Áýe kemesiniń synyqtary Tapýa provınsııasyndaǵy Oktabe okrýginiń aýmaǵynda tabylǵan. Ushaqtyń bortynda 49 jolaýshy jáne bes ekıpaj múshesi bolǵan. Keıbir málimetterge qaraǵanda, áýe kemesi Oksıbıl qalasynan shamamen 25 shaqyrymdaı jerdegi taýǵa soǵylǵan sııaqty. Bul qala Jańa Gvıneıa aralynyń aýmaǵynda ornalasqan. Indonezııa kólik mınıstrligi ókiliniń aıtýynsha, ushaq bortymen baılanys áýejaıdan ushyp shyqqannan 33 mınýt ótkende úzilgen. Al reıstiń ushý uzaqtyǵy bir saǵat shamasynda.
Paraqordyń aqshasyn sanaýǵa 24 saǵat jumsaldy
Úndistannyń Batys Bengalııa shtatynda bir sheneýniktiń para retinde alǵan aqshany sanaýǵa polıseıler bir kún ýaqytyn jumsapty. Muny osy el telearnasy habarlady.
Telearnanyń habary boıynsha, quqyq qorǵaý organdarynyń qyzmetkerleri álgi sheneýniktiń Bellı qalasyndaǵy úıinen 200 mıllıon (3 mıllıon dollardan astam) rýpıı taýypty. Ol aqsha edenge tóselgen plıtanyń astyna, shkaf pen matrastarǵa, dıvanǵa, jýynatyn bólmege, taǵy basqa jerlerge jasyrylǵan eken. Osy aqshalardy sanap shyǵýǵa úsh eseptegish mashına qoldanylǵan, al aqshany sanaýǵa 24 saǵat ýaqyt ketken. Jemqordyń aty-jóni – Pranabý Adhıkarı. Ol 25 jyl boıy qurylys salýǵa ruqsat beretin mekemede istep kelgen ári osyǵan jaýapty bolǵan.
Avıasoqqydan beıbit turǵyndar qaza tapty
Sırııanyń áskerı áýe kúshteri Damask qalasynan 15 shaqyrymdaı qashyqtyqqa oryn tepken Dýma qalasyndaǵy bazardy atqylady. Sonyń saldarynan 80 beıbit turǵyn qurban bolyp, 200-den astam adam jaraqat aldy.
Sırııanyń adam quqyǵy jónindegi ókiliniń aıtýynsha, ıstrebıtelderden bazarǵa qaraı kem degende on zymyran jiberilgen. Soqqy berý oqıǵa bolǵan jerge qutqarýshylar kelgen kezde de jalǵasqan. Jergilikti turǵyndar bazardaǵy saýda alańdarynyń barlyǵy túgeldeı qıraǵanyn aıtady. Al «Reıter» aqparat agenttigi Sırııa armııasynyń bul operasııasy el prezıdenti Bashar Asadtyń rejimine qarsy toptardy joıý úshin berilgen soqqy ekendigin keltiredi. О́ıtkeni, 15 tamyzda Islam Army toptarynyń sodyrlary úkimettik áskerdiń pozısııasyna shabýyl jasaǵan eken.
Qysqa qaıyryp aıtqanda:
Úndistan premer-mınıstri Narendra Modı Birikken Arab Ámirlikterine resmı saparmen bardy. Bul osy el úkimetiniń 34 jyldan keıingi BAÁ-ge jasaǵan alǵashqy sapary bolyp tabylady.
Soltústik Koreıa bıligi AQSh pen Ońtústik Koreıa birlesken oqýlaryna «belgisiz qarýmen» jaýap beretini jóninde qoqan-loqy kórsetti. «QHDR halqy men áskeri burynǵydaı osal emes», – dedi osy jóninde qorǵanys komıtetiniń ókili.
Iraktyń premer-mınıstri Heıdar ál-Abadı joǵary memlekettik laýazymdardy qysqartý jáne birqatar mınıstrlikterdi biriktirý týraly jarlyq shyǵardy. Osyǵan baılanysty mınıstrlikter sany 33-ten 22-ge qysqartylady.
Mysyr prezıdenti Abdel Fattah Sısı elde terrorshyldyqqa qarsy sharalardy kúsheıtý týraly zańdy maquldady. Atalǵan qujatqa sáıkes terrorshyl uıymǵa jetekshilik etken adam ómir boıy bas bostandyǵynan aıyrylady.
Tanymal akterdiń nemeresin óltirip ketti
Nıý-Iork qalasynda tanymal akter Morgan Frımenniń nemeresi Iden Haınsti óltirip ketti. «Assosheıted press» agenttiginiń habarlaýynsha, qaıǵyly oqıǵa qalanyń eń kórikti aýdany Manhettende bolǵan.
Otyz úsh jastaǵy I.Haınske belgisiz bireý keýde tusynan birneshe ret pyshaq siltegen. Aýrýhanaǵa jetkizilgenimen, aýyr jaraqat alǵan ol qaıtys boldy. Oqıǵa bolǵan jerge shuǵyl jetken polıseıler zardap shekken Haınstiń janynda turǵan otyzdar shamasyndaǵy er adamdy ustady. Polıseıler buryn onyń júıkesi syr bergenin anyqtaǵan.
1,5 saǵatta 70 qap kartop jınady
Belarýs prezıdenti Aleksandr Lýkashenko jeksenbi kúngi demalysynyń bir bóligin óziniń rezıdensııasynda kókónis ónimderin jınaýǵa jumsady. Onymen birge kishi uly Nıkolaı da eńbek etti, dep habarlady prezıdenttiń baspasóz qyzmeti.
On segiz sotyq ýchaskege egilgen kartopty olar 1,5 saǵat ishinde jınap úlgergen. Jınalǵan ónim 70 qapty qurapty. Baspasóz qyzmeti taratqan habarlamada jınalǵan ónimderdiń barlyǵy jaqyn kúnderi balalar úıleri men qarttar úılerine beriletini atalǵan. Memleket basshysynyń rezıdensııasynda jeksenbi kúni, sondaı-aq, baqsha daqyldary – qarbyz ben qaýyndy jınaý bastalǵan. Al sabaǵynan úzilip alynǵan alǵashqy qarbyzdyń dámin tatý rásimi alqaptyń ózinde bolǵan eken.
50 saıttyń jumysyna tosqaýyl qoıyldy
Qytaı bıligi osy eldiń kıberkeńistik ákimshiliginiń talaby boıynsha 50 saıttyń jumysyna tosqaýyl qoıdy. Buǵan ınternette Tıanszındegi jarylystyń saldary jóninde anyq emes aqparattardy taratý sebep bolǵan.
Qazirgi kezde qadaǵalaýshy organ 18 saıttyń jumysyn toqtatty jáne lısenzııasynan aıyrdy. Endi taǵy 32 portaldyń qyzmeti toqtatylady. О́ıtkeni, olar jarylystan qurban bolǵandar sany týraly naqtylanbaǵan aqparatty taratqan jáne óńirde tártipsizdikter men tonaýshylyq oryn aldy degen jalǵan faktiler keltirgen. Bul jaǵdaıdy ádeıi ýshyqtyrý bolyp tabylady. Sońǵy málimetterge qaraǵanda, apattan 112 adam qaza tapqan, 95 adam iz-túzsiz ketkenderdiń qatarynda.
Internet materıaldary negizinde ázirlendi.