Jetisýda sıfrlyq tehnologııalarǵa qyzyǵýshylyq tanytatyn jastarǵa arnaıy alań ashyldy. Oblys ortalyǵynda ornalasqan «Jetisu Digital» IT-habynyń uıymdastyrýymen jazǵy IT-lager óz jumysyn bastady. Bul jas býynǵa zamanaýı tehnologııalar álemine tereńirek úńilýge jol ashady.
Bul bastamaǵa mektep oqýshylary, kolledj jáne joǵary oqý oryndarynyń stýdentteri, jas ázirleýshiler qosyldy. Odan bólek, dızaınerler, medıakontent jasaýshylar men aqparattyq tehnologııalarǵa qyzyǵýshylyq tanytatyn jastardy biriktirdi. Munda olar ınnovasııalyq oılaý qabiletin damytyp, tehnologııalyq qaýymdastyq qalyptastyrýǵa beıimdeledi.
Oblystyq sıfrlyq tehnologııalar basqarmasynyń málimetinshe, lagerdiń negizgi maqsaty – jastardy jasandy ıntellekt, sıfrlyq dızaın, baǵdarlamalaý jáne medıakontent óndirý salalaryndaǵy zamanaýı úrdistermen tanystyrý. Sonymen qatar qatysýshylardyń shyǵarmashylyq áleýetin ashyp, komandalyq jumys júrgizýge baýlıdy. Sondaı-aq jobalyq oılaý daǵdylaryn jetildirýge jaǵdaı jasaý kózdelgen.
IT-lager baǵdarlamasy Ashyq esik kúninen bastaldy. Alǵashqy kúni qatysýshylar «Jetisu Digital» IT-habynyń qyzmetimen, bilim berý bastamalarymen jáne óńirdegi tehnologııalyq jobalardy damytý múmkindikterimen tanysty. Hab mamandary jastarǵa qazirgi tańda júzege asyp jatqan oqý baǵdarlamalary, startaptardy qoldaý tetikteri jáne sıfrlyq ındýstrııadaǵy suranysqa ıe baǵyttar týraly jan-jaqty aqparat berdi.
Baǵdarlamanyń mańyzdy bóligi – «AI Bootcamp» praktıkalyq sabaqtary. Bul alańda qatysýshylar jasandy ıntellekt múmkindikterin tájirıbe júzinde ıgerip, túrli sıfrlyq quraldarmen jumys isteýdi úırenedi. Sabaqtar barysynda ınterfeıs pen veb-dızaındy neırojelilerdiń kómegimen ázirlendi. Foto jáne beınekontent jasaý, IT-jobalar men sıfrlyq ónimderdiń alǵashqy prototıpteri daıyndaldy. Sondaı-aq zamanaýı tehnologııalardy shyǵarmashylyq baǵytta paıdalaný joldary kórsetildi.
Uıymdastyrýshylardyń aıtýynsha, lagerdiń ereksheligi – oqytý úderisiniń tek dáristermen shektelmeýi. Munda teorııalyq bilim tájirıbelik jumystarmen, shyǵarmashylyq tapsyrmalarmen jáne erkin qarym-qatynaspen ushtasady. Bul jastardyń jańa aqparatty jeńil qabyldaýyna jáne alǵan bilimin birden tájirıbede qoldanýyna múmkindik beredi.
«Jetisu Digital» IT-habynyń menedjeri Rahman Aıdarulynyń aıtýynsha, lagerdiń basty qundylyǵy – jastarǵa tehnologııany tek tutynýshy retinde emes, ony jasaı alatyn jáne damyta alatyn maman retinde qaraýǵa múmkindik berý.
«Bizdiń maqsatymyz – qatysýshylarǵa zamanaýı sıfrlyq quraldardyń múmkindikterin kórsetý ǵana emes, olardyń shyǵarmashylyq jáne kásibı áleýetin damytý. Lager barysynda jastar jasandy ıntellekt negizinde jumys isteıtin platformalarmen tanysyp, sıfrlyq ónimder ázirleýdiń alǵashqy qadamdaryn jasaıdy. Sonymen qatar biz komandalyq belsendilikterge de erekshe nazar aýdaryp otyrmyz. Ústel oıyndary, pikirtalas alańdary, shyǵarmashylyq tapsyrmalar men kıno keshteri qatysýshylardyń bir-birimen jaqynyraq tanysyp, jańa ıdeıalarmen almasýyna múmkindik beredi. Mundaı beıresmı orta bilim alýdyń tıimdiligin arttyryp, jastardyń kommýnıkatıvtik jáne áleýmettik daǵdylaryn damytýǵa yqpal etedi», deıdi ol.
Lager aıasynda uıymdastyrylǵan túrli komandalyq oıyn men ınteraktıvti sharalar qatysýshylar arasynda dostyq atmosfera qalyptastyrdy. Jastar óz ıdeıalaryn ortaǵa salyp, jańa bastamalardy talqylap, tájirıbe almasty.
Uıymdastyrýshylardyń pikirinshe, mundaı jobalar óńirdegi tehnologııalyq mádenıetti damytýda mańyzdy oryn alady. Sebebi búginde jasandy ıntellekti men sıfrlyq tehnologııalar bilim berý, bıznes, medıa, marketıng jáne baǵdarlamalyq ónimder ázirleý sııaqty kóptegen salanyń ajyramas bóligine aınalyp otyr. Sondyqtan jastardyń bul baǵyttarǵa erte qyzyǵýshylyq tanytýy olardyń bolashaqtaǵy kásibı damýyna oń áser etedi.
Taldyqorǵan qalasyndaǵy №19 orta mekteptiń 11-synyp oqýshysy Erasyl Sanaq mundaı alańdardyń jastar úshin mańyzy zor ekenin atap ótti.
«Maǵan IT Campus formaty óte unady. Barlyǵy erkin ári qyzyqty uıymdastyrylǵan. Eń bastysy – ár jerden kelgen oqýshylar bir-birimen tanysyp, tájirıbe bólisip, jańa daǵdylardy úırendi. Osyndaı jobalar jastardyń dúnıetanymyn keńeıtip, jańa dostar tabýyna jáne tehnologııalarǵa degen qyzyǵýshylyǵyn arttyrýǵa kómektesedi. Meniń oıymsha, bul bastama aldaǵy ýaqytta da damyp, jastardyń jańa ıdeıalaryn júzege asyratyn mańyzdy ortalyqqa aınalady», deıdi ol.
Búginde sıfrlyq tehnologııalar qoǵam ómiriniń barlyq salasyna dendep enip keledi. Osy turǵydan alǵanda, Jetisý óńirinde qolǵa alynǵan jazǵy IT-lager jastardyń zamanaýı bilim men daǵdylardy meńgerýine múmkindik beretin mańyzdy bastama bolyp otyr. Mundaı jobalar bolashaqta óńirdiń tehnologııalyq áleýetin arttyryp qana qoımaı, jańa býynnyń ınnovasııalyq oılaýyn qalyptastyrýǵa, sıfrlyq ekonomıkaǵa qajetti bilikti mamandar daıarlaýǵa da yqpal etpek.
Jetisý oblysy