Kókshetaý medıa ortalyǵynda respýblıkalyq «Bas redaktorlar» klýby Qazaqstan Respýblıkasy Investısııalar jáne damý mınıstrliginiń, Aqmola oblysy ákimdiginiń qoldaýymen «Búgingi kún – buqaralyq aqparat quraldary» taqyrybynda semınar ótkizdi. Oǵan óńirdegi respýblıkalyq BAQ ókilderi, oblystyq jáne aýdandyq aqparat quraldarynyń basshylary qatysty.
Basqosýda respýblıkalyq «Bas redaktorlar» klýbynyń prezıdenti Bıbigúl Jeksenbaı Elbasy Nursultan Nazarbaevtyń «Nurly Jol – bolashaqqa bastar jol» atty halqymyzǵa Joldaýynan jáne «100 naqty qadam» Ult josparynan týyndaıtyn mindetter jáne búgingi kúngi BAQ-ty damytýdyń ózekti máseleleri» taqyrybynda baıandama jasady. Onda Qazaqstan Prezıdentiniń bes ınstıtýttyq reformasyn otandastarymyz ben sheteldik qaýym qyzý talqylap, qoldaý kórsetip jatqany, bul oraıda buqaralyq aqparat quraldaryna mańyzdy mindetter júkteletini atap kórsetildi. Qabyldanyp jatqan memlekettik jáne ulttyq baǵdarlamalardy halyq sanasyna jetkizip qana qoımaı, olardyń oryndalýyna buqaralyq yqpaldy arttyrý el damýyna erekshe ekpin beretini aıqyn. Osyǵan oraı, sheshen Malaızııanyń sońǵy jıyrma jyldaǵy serpindi damýyn ózge memlekettermen salystyra taldap kórsetti. Bul táýelsiz Qazaqstannyń jigerli qadamdarymen uqsas ekendigi de aıtyldy. Álemdik sarapshylar osy úrdisti halyqtyń aqparatqa qoljetimdiligimen baılanystyrýy tegin emes. О́mir jáne ǵalamdyq keńistiktegi bolmys jyldam ózgerýde. HHI ǵasyr aqparat áleýetine súıengen ǵasyr. Sondyqtan, otandyq jýrnalıstıka básekelestik alańynda aldyńǵy saptan kórinýi tıis. Belsendilik bastaýynda kásibı sheberlik turatyny belgili.
Respýblıkalyq «Novoe pokolenıe» gazeti bas redaktorynyń orynbasary Iýlıana Jıhordiń «Búgingi kúnniń dástúrli BAQ-tary» baıandamasynda gazetter men jýrnaldardyń qazirgi kúngi baǵyttary keńinen sıpattaldy. Aqparatqa degen suranys elektrondyq ónimderdiń ótimdiligin kórsetýde. Bul oraıda básekelestik birinshi orynǵa shyǵady. Qazirgi kezde barlyq gazetter derlik oqyrmandaryna óziniń elektrondyq nusqasyn usynýda. Bul oraıda da halyqtyń taldamalyq ári saýatty aqparatty kútetini anyq. Qazir ekinshi tolqyny júrip jatqan jekeshelendirý naýqany dástúrli BAQ-tardyń qoǵam tynysyndaǵy mazmunyn ózgerte almaıtyny da belgili.
Semınarǵa qatysýshylar Túrik eliniń «JIHAN» aqparattyq agenttiginiń ókili Iyldyz Dogannyń «Qazaqstandyq BAQ-tyń sheteldik menshikti tilshileri qosynymen yntymaqtasty-
ǵynyń aımaqtyq tájirıbesi» taqyrybyndaǵy baıandamasyna jýrnalıster aıryqsha qyzyǵýshylyq tanytty. Birinshiden, baıandama mazmundylyǵymen tartymdy bolsa, ekinshiden, Iyldyz baýyrymyzdyń taza qazaq tilinde sóıleýi búgingi kúnniń jýrnalısterine oı salǵany anyq. Álemdik aqparattyq keńistiktiń alǵashqy ondyǵynda turǵan «JIHAN» jer júziniń 85 eline tórt tilde aqparat taratyp, 35 elde ókildigin ustaıdy. Sonymen qatar, agenttik jýrnal shyǵaryp, radıo, telehabarlardy taratyp otyr. Munyń ózi zamanaýı BAQ tek aqparattyq yqpalmen shektelip qalmaýy kerektigin bildiredi.
Iyldyz Dogan aǵylshyn tiliniń mamany. Alaıda, Qazaqstanda jýrnalıstik qyzmet atqarǵanyna jıyrma jyldan asyp barady. «Bul kásip meni jazýǵa, sýretke túsirýge, beıneapparatty meńgerýge, birneshe tilde sóıleýge úıretti», deıdi ol.
«Habar» agenttigi AQ «Bilim jáne mádenıet» arnasy bas redaktorynyń orynbasary Baýyrjan Shamshatov «Qazirgi zamanǵy televızııalyq jýrnalıstıkanyń ózekti máseleleri» týraly oı qozǵady.
Baqbergen AMALBEK,
«Egemen Qazaqstan».
KО́KShETAÝ.