QOSTANAI. 15 mamyr. Qostanaıǵa Indonezııa Respýblıkasynyń Tótenshe jáne ókiletti elshisi Foster Gýltom myrza keldi. Ol aldymen A.Baıtursynov atyndaǵy Qostanaı memlekettik ýnıversıtetinde bolyp, stýdenttermen kezdesti. Bul týraly egemen.kz tilshisi habarlady.
Elshi myrza aldymen ýnıversıtet basshylyǵymen kezdesti. Onda eki jaq Indonezııa men Qazaqstan arasyndaǵy akademııalyq sala qyzmeti áleýetin, áriptestik yntymaqtastyqty arttyrýdy talqylady. Odan keıin jýrnalısterge óziniń kelgen sapary jóninde aıtyp berdi.
Indonezııa Respýblıkasynyń Qazaqstandaǵy Tótenshe jáne ókiletti elshisi Foster Gýltom: «Qostanaı óńirine kelý meniń kópten beri oılastyryp júrgen maqsatty saparym edi. Osy kelgen saparymda ýnıversıtet basshylarymen jáne oblys ákimimen, jergilikti bıznes ókilderimen kezdesemin. Ýnıversıtette boldym. Qazaqstandaǵy tórt ýnıversıtetpen baılanysymyz bar. Biz bul akademııalyq baılanysty jalǵastyra beremiz. Men jyly qabyldaǵany úshin, ýnıversıtetpen, onyń stýdentterimen kezdeskenim úshin rahmet aıtamyn. Sonymen qatar qostanaılyqtarǵa Indonezııanyń mádenıeti týraly aıtyp beretin bolamyz», dedi.
Elshige A.Baıtursynov atyndaǵy Qostanaaı memlekettik ýnıversıtetiniń ǵylym jáne syrtqy baılanys jónindegi prorektory Jeńis Jarlyǵasov bilim ordasy týraly keńinen aıtyp berdi.
Elshini de, A.Baıtursynov atyndaǵy Qostanaı memlekettik ýnıversıtetiniń basshylyǵyn da aldymen joǵary bilim salasyndaǵy yntymaqtastyq qyzyqtyrady. Elshi Foster Gýltom Qostanaı ýnıversıteti Indonezııadaǵy ýnıversıtetterdiń birin tańdap, aldaǵy ýaqytta mamandar daıyndaý isinde baılanys jasaýyna bolatyndyǵyn aıtty. Ol úshin Indonezııa respýblıkasynyń úsh baǵyttaǵy baǵdarlamasy týraly da aıtyp ótti. Indonezııadaǵy tórt ýnıversıtet dúnıe júzindegi eń ozyq 100 joǵary oqý ornynyń qatarynda eken.
Elshimen birge kelgen ındonezııalyq jastar ýnıversıtet stýdentterimen kezdesip, eliniń mádenıetin, ónerin, dástúrin kórsetti.
Indonezııanyń Qazaqstandaǵy tuńǵysh tótenshe jáne ókiletti elshisi Foster Gýltom myrza oblys basshylyǵymen, bıznes ókilderimen kezdesýde alys-beris týraly áńgimeleıtin bolady.
Názıra Járimbetova.
Derek, sýret: egemen.kz