Brazılııany baǵyndyrǵan Medet

«Astana Opera» teatrynyń jetekshi solısi Medet Shotabaev jaqynda brazılııalyq Theatro Municipal (San-Paýlý) sahnasynda Dj. Verdıdiń «Otello» operasyna qatysyp, úlken tabysqa qol jetkizdi. Kassıo partııasyn qatarynan tórt kún oryndaǵan ánshini dırıjerlyq tizginde ataqty Djon Neshlıng súıemeldese, operanyń qoıýshy-rejısseri – «Astana Opera» teatrynda «Abaı» operasyn sahnalaǵan belgili rejısser Jankarlo del Monako.

Eske sala keteıik, ártisti Brazılııaǵa eýropalyq opera agenti Stefanııa Gamba shaqyrǵan bolatyn. Ol qazaq ánshisiniń Marchello Djordanı qorynyń bedeldi halyqaralyq vokaldyq baıqaýy barysynda (2013 j.) jarqyrap án salǵanyn baıqap qalǵan, bul Medet Shotabaevtyń qanjyǵasyna úshinshi júldeni baılap úlgergen kezi bolatyn.

San-Paýlýdyń Mýnı­sıpaldyq teatrynyń kóne sahnasynda (Brazılııa) Qu­daı-aý, kimder án salmaǵan deseń­shi. Enrıko Karýzo, Benıamıno Djılı, Marıo Del Monako, Marııa Kallas, Renata Tebaldı, Ar­týro Toskanını, Kamargo Gvar­nerı, Eıtor Vılla-Lobos, Petro Maskanı, Anna Pavlova, Artýr Rýbınshteın, Dıýk Ellıngton, Ella Fısd­jerald, Aısedora Dýnkan, Margo Fonteın...álemdegi operanyń eń ja­ryq juldyzdary túgel osy sahnanyń samalymen samǵaǵan.

– Bul men úshin Bra­zılııanyń ásem teatr­larynyń birindegi debıýt boldy, úzdik óner ordasynyń rýhy men dástúri keremet saqtalǵan eken. Maǵan Marııa teatrynyń tenory – Avgýsto Amonovpen qosyla shyrqaý baqyty buıyrdy, aıtpaqshy, onyń ózi Almatynyń týmasy. Birinshi quramda bas partııany álemdik deńgeıdegi tenor Gregorı Kýnde oryndady, keıin ol maǵan birneshe ret sheberlik dárisin ótkizdi. Men «Bogema» operasynan Rýdolftiń arııa­syn shyrqap berip edim, ol ıtalıalyq tilimniń deńgeıin maqtaı kelip, munan da ary qaraı shyńdala berýge keńes berdi, – dedi jýrnalısterge bergen suhbatynda opera ánshisi. Jetekshi solıst munan ári atalǵan teatrdyń jumys qarqyny joǵary ekenin, ulttyq jáne halyqaralyq dárejedegi uly lıbrettoshylar men kompozıtorlardyń operalarynyń tusaýkeseri birinen keıin biri almasyp jatatynyn atap ótti.

Bir qyzyǵy, olarda tu­raqty operalyq trýppa degen atymen joq, shtatta tek hor men orkestr ǵana bolǵanmen, negizinen opera solısterin álemniń ár shalǵaıynan tańdap shaqyrtyp jatady. Sondyqtan brazılııalyq kórer­men qazaqstandyq ártis­ke zor qoshemet kórsetip, aıamaı qol soǵyp otyrdy. Qoıylymnan keıin olar óner ıesi jaıynda jyly lebizderin bildirip, qoltańba alyp qalýǵa asyqty.

– Keıbireýi meniń Qazaq­stannan ushyp kelgenime sonshalyq sene qoımaǵandaı kúmán keltirdi. San-Paýlý­daǵy áriptesterimnen «Buǵan deıin qazaq ánshisin kórip pe edińizder?» dep suradym. «Joq, siz birinshisiz», – dedi olar. Soǵan qaramastan, olar meni óte jaqsy qarsy aldy, munda aqjarqyn, keń peıil jandar turady eken, dedi M.Shotabaev San-Paýlý sapary jaıynda.

Ánshi brazılııalyq tamaq­qa biraz ýaqyt úırene almaı, ásirese, úıdiń sorpasyn qatty saǵynǵanyn aıtyp qaldy. «Asaı degen jıdekterin jep kórdim, ony munda balmuzdaq retinde usynady eken. Ol boıǵa qýat beredi, sahnaǵa shyǵar aldynda kúnde sony jep júrdim, daýysym óte jaqsy shyqty. Al asaı adam aıaǵy jete bermeıtin Ama­zonka taýlarynda ósetin je­mis kórinedi» dep óner ıe­si ondaǵy tamaqtaný máde­nıetiniń ereksheligine kóńil bólip ótti.

Medet Shotabaevtyń San-Paýlý Mýnısıpaldyq teatry sahnasyndaǵy endigi óneri 31 mamyrda jáne 4-7 maýsymda jalǵasady, bul joly ánshi «Evgenıı Onegın» ope­rasyndaǵy Lenskııdiń partııa­syn shyrqaıdy dep kútilýde.

Saltanat ÁSKERBEKQYZY.