ASTANA. 24 tamyz. Búgin Astanada dzıýdodan álem chempıonaty bastaldy. Soǵan oraı Ortalyq kommýnıkasııalar qyzmetinde jarystyń uıymdastyrylý barysy jáne álemdik dodanyń halyqaralyq arenada Qazaqstanǵa tıgizer oń áseri týraly jıyn ótti. Oǵan Mádenıet jáne sport mınıstrligi sport jáne dene shynyqtyrý isteri jónindegi komıtet tóraǵasynyń orynbasary Serik Jarasbaev qatysty. Bul týraly egemen.kz habarlady.
Onyń aıtýynsha, otandyq palýandarǵa qoıylar basty talap – álemdik reıtıngte úzdik 22 sportshynyń qataryna qosylý. Sebebi, mundaı nátıjege qol jetkizgen atlet kelesi jyly Rıo-de-Janeıro Olımpıadasyna tikeleı joldama alady. Sondaı-aq, tóraǵa orynbasary Astanadaǵy doda Oıyndarǵa qatysýǵa múmkindik beretin sońǵy jarys emes ekenin aıtty.
«Olımpıadaǵa joldama Halyqaralyq dzıýdo federasııasynyń reıtıngine sáıkes beriledi. Álem chempıonatynan bólek, upaı alýǵa bolatyn basqa da halyqaralyq týrnırler bar. Degenmen, óz jerimizde ótkizilgen dodada sportshylarymyz aıanyp qalmaıdy. Sebebi, dál osy týrnırdiń nátıjesi boıynsha ulttyq quramanyń negizi jasaqtalady», – dedi Serik Jarasbaev.
Aıta keteıik, Astanadaǵy saıysta 137 memleketten kelgen 823 atlet baq synaıdy. Olardyń 495-i erler bolsa, 328-i áıelder. «Alaý» muz aıdynynda ótkiziletin chempıonat 30 tamyzda aıaqtalady. Jarystyń translıasııasy 150 memleketke taraıdy. Elimizde palýandardyń beldesýleri KazSport telearnasynan tikeleı efırde kórsetiledi.
Elaman Qońyr.
Derek: egemen.kz.
Sýret: worldjudo2015.kz.