О́SKEMEN. 25 tamyz. Elimizdiń tarıhynda alǵash ret otandastarymyz AQSh-ta ótken XIV arnaıy jazǵy Olımpıada oıyndaryna at oıyndary boıynsha qatysty. Mártebeli jarysta shyǵysqazaqstandyq tórt sportshy 8 medal jeńip aldy. Onyń ishinde 2 altyn, 5 kúmis jáne 1 qola medal bar. Bul týraly egemen.kz tilshisi habarlady.
Byltyr Shyǵys óńirinen shyqqan tulparterapııashylar toby Máskeýde ótken jarystan da júldeli qaıtqan bolatyn. Olımpıadadan da oljaly oralǵan sportshylardy jerlesteri áýejaıdan úlken qoshemetpen kútip aldy.
«Sizder Olımpıada oıyndarynda memleket mártebesin kóterdińizder. Alǵashqy kúni-aq altyn medal oljalaı otyryp, sportshylarymyzǵa dem berdińizder. Biz árdaıym jeńimpazdarymyzben maqtanamyz! Sizderge jańa shyńdardy baǵyndyrýlaryńyzǵa tilektespiz», – dedi Parlament Májilisiniń depýtaty Nıkolaı Kýzmın.
Los-Andjeles qalasynda ótken arnaıy Olımpıada oıyndary eki aptaǵa sozylǵan bolatyn. Atalǵan ýaqytta jerlesterimiz álemniń ár túkpirinen kelgen 125 sportshy-shabandozben «júris», «soqpaq» syndy arnaıy baǵdarlamalar boıynsha saıysqa tústi. Jattyqtyrýshylardyń aıtýynsha, Olımpıada kezinde qazaqstandyq sportshylar bógde jylqylarǵa minse de, janýarlardy jatsynbaı, jeńiske birge jete bildi.
Aıta keteıik, Olımpıadaǵa jer-jahannyń barlyq túkpirinen sporttyń 15 túri boıynsha 7 myń sportshy qatyssa, onyń ishinde 72 qazaqstandyq el abyroıyn laıyqty qorǵady.
Dýman Anash.
Derek, sýret: egemen.kz.