ASTANA. 4 sáýir. Máskeý bıligi «sońǵy qońyraýdan» keıin mektep túlekteri qydyratyn oryndarda alkogol ónimderin satýǵa tyıym salýdy josparlap otyr. Bul rette negizinen qaladaǵy saıabaqtar nysanaǵa alynýda. Jergilikti ákimshilik orys jastary arasynda keńinen taralǵan ishimdik ishý úrdisimen osylaı kúresip kórmek. Bul týraly izvestia.ru habarlady.
Máskeýdiń qalalyq saýda jáne qyzmet kórsetý departamentiniń basshysy Alekseı Nemerıýktiń aıtýynsha, bul kúndi meıramhanalarda atap ótkisi kelgen túlekterge tek 100 gramm aqqaınar ishýge ruqsat beriledi. «Osy maqsatta biz qaladaǵy meıramhanalardyń mázirimen, mektep dırektorlary jáne ata-analarmen arnaıy jumys jasaıtyn bolamyz. Sondyqtan jyldaǵy dástúr boıynsha túlekter qydyratyn oryndarda ishimdik satylmaıdy. Biraq, biz qansha tyıym salsaq ta, túlekter dástúr boıynsha, joq degende, aqqaınar ishetinin bárimiz jaqsy bilemiz. Sony eskerip, biz onyń mólsherin shektep otyrmyz. Iаǵnı, mektep bitirýshilerge atalǵan ishimdikten tek 100 gramm ǵana ishýge ruqsat beriledi», – deıdi sheneýnik.
Reseıdegi meıramhana jáne qonaq úı qojaıyndary federasııasynyń prezıdenti Igor Býharov bul másele jóninde: «Meıramhanalarda jasóspirimderge spırttik ónimderdi tek ata-analary ǵana quıyp beredi. Kámelettik jasqa jetpegen azamatqa daıashynyń alkogoldik ishikdik quıyp berýine quqy joq. Desek te, bizde ata-analardyń ózderi soǵan jol berip jatady. Sondyqtan bul iste tek ata-analar jaýapty», – dedi.
Al keıbir sarapshylar 100 gramm aqqaınarǵa da ruqsat bermeý kerek dep sanaıdy. Sebebi, olar jasóspirimderge «ruqsat» degen sózdiń ózi jetip jatqanyn aıtyp otyr. «Ishimdikpen kúres – Reseıdegi eń ózekti másele. Sondyqtan endi jetilip kele jatqan jastardyń sanasyn soǵan qarsy tárbıeleýimiz kerek. Al «ruqsat beremiz» dep, onyń mólsherin kórsetkennen eshqandaı paıda joq. Sebebi, jas sana tek «ruqsat» degen sózdi qabyldap, ar jaǵyndaǵy shekteýge nazar aýdarmaıdy», – deıdi mamandar.
Búginde Reseıde mektep jasyndaǵy oqýshylar arasynda ishimdik ishý jyl saıyn artyp otyr. Sony eskergen eldegi Qoǵamdyq palata Bilim jáne ǵylym mınıstrligine «sońǵy qońyraý» aldynda mektepterde ishimdiktiń zııany týraly arnaıy sabaqtar ótkizýdi usyndy.
Aıta keteıik, 1 mamyrdan bastap Máskeýde reseılik jastar arasynda keńinen taralǵan alkogoldik-energetıkalyq ishimdikterge tyıym salynady. Qazir bul bastamaǵa Máskeý oblysy da qosylǵysy keletinin aıtýda.
Elaman Qońyr.
Derek, sýret: izvestia.ru.