Armanymyz asqaq, muratymyz bıik

2016 jyl Qazaqstan Táýelsiz­diginiń 25 jyldyq uranymen ulaǵatty isterge jol siltep, 1 qańtardan bastap «5 ınstıtýttyq reformany júzege asyrý boıynsha 100 naqty qadam» Ult Josparyn oryndaýdyń praktıkalyq kezeńi bastaldy. Kemel keleshekke baǵyt bolǵan Elbasymyzdyń Ult Jospary Qazaqstannyń búgini men bolashaǵy úshin mańyzdy tapsyrmalardy qamtıtyn Jol­daýlardyń negizgi tetikterin iske asyratyn ǵalamdyq joba. Qazaqstan Respýblıkasynyń Prezıdenti – Elbasy Nursultan aǵamyzdyń «Ult Jospary – qazaqstandyq armanǵa bastaıtyn jol» maqalasyn oqı otyryp, men ózimniń baqytty elde turyp jatqanymdy barynsha túsinip, bizge osyndaı suńǵyla saıasatkerdi syılaǵan Jaratqanǵa myń da bir taǵzym etip, alǵys aıtamyn. Qanshama máseleler qamtyl­ǵan, qanshalyqty tereńnen qozǵa­lyp, túsinikti jazylǵan ǵala­mat mańyzdy jobalar álem pre­zıdentteri men iri saıasatkerlerdiń qol jetpeıtin ańsaǵan armany der edim. Biz – armany asqaq elmiz. Biz – básekege qabiletti ultpyz. Bizdiń elde ult pen ulystar jáne kóptegen etnostar bolǵanymen, maqsatymyz ortaq, muratymyz – bir. Ol eli baqytty, jeri gúldengen qasıetti Otanymyz Qazaqstandy – Máńgilik El etý! Elbasymyzdyń sózimen aıtar bolsaq: «Biz táýelsiz Qazaqstandy Uly Dala eli retinde jańadan qalyptastyra aldyq. Endi osy baǵytymyzǵa kúsh-qýat berip, elimizdi álemdegi eń ozyq 30 memlekettiń birine aınaldyrý turǵysynda uly muratty iske asyrýǵa batyl qadam jasap kele jatyrmyz. Sol uly mu­rat­ty is júzine asyratyn uly Ult Jos­parymyz da bar. Bul jospar barlyq jańǵyrtýlarǵa, jańarýlarǵa serpin beretin jos­par. Eger biz birlik pen tatýly­ǵymyzdy biriktirip qımyl ja­sasaq, Qazaqstan halqynyń almaıtyn qamaly, aspaıtyn asýy joq dep oılaımyn». Belgili bir maqsatqa qol jet­kizý úshin, eń aldymen, óziń­nen bastaýyń kerek. О́ziń úshin, otbasyń, eliń úshin qyzmet jasasań, sonda ǵana árbir azamat ózine ne kerektigin túsinip, qadirin biledi. Sol kezde ǵana biz damyǵan memlekettermen birge, qatar turyp teńese alamyz. Ekonomıkamyzdy ǵana emes, endi memleketimizdi, qoǵamdyq ortany jańǵyrtý ıdeıalaryn qolǵa alýǵa tıispiz. Patrıottyq sezimi kúshti, ana tilin qurmetteıtin, rýhanı baı el qaı zamanda da baqýat turǵan. Sondyqtan da, kúndelikti ómirde ne bolyp jatqanynan habardar bolyp, el taǵdyry men ult bolashaǵy úshin jasalynyp jatqan ıgi sharalarǵa neǵurlym belsendi aralasatyn bolsaq, aldymyzdaǵy bar­lyq kedergilerdi, eko­nomıkalyq daǵ­da­rystardy soǵurlym tez­detip jeńe alamyz. Al qıyndyq ataý­lyny jeńýdiń bir ǵana joly bar. Dana halqymyzdyń qadir tutqan qasıetti sózderimen – «Kóppen kórgen uly toı» dep izgi bastamalardyń uıytqysy bolyp, yntymaq pen birligimizdi bekitip, keńdik pen kemeńgerlikte, sabyrlyq pen iskerlikti kórsetip, bir-birimizge qaraılasatyn, aǵaıyndyqty kórsetetin, tanytatyn kún týdy. Ult Josparyn júzege asyrý úshin memlekettik emes sektordyń jumysyn meılinshe jandandyrýymyz kerek. Sebebi, elimizde reformalardy júzege asyrý tek memlekettik organdarǵa ǵana júktelgen mindet emes. Bul týraly Elbasymyz ylǵı da aıtyp keledi. Azamattyq aýyzbirlik aýadaı qajet bolyp otyrǵan kezde azamattyq qoǵamdy odan ári damytý qazirgi reformanyń bir ba­ǵyty. Jalpy, azamattyq qoǵamdy qalyptastyrý oraıynda bizde burynnan kele jatqan Qazaqstan halqy Assambleıasy arnaıy jospar qabyldap, etnomádenı birlestikter qoǵamdyq jumys­tarǵa úzdiksiz aralasyp keledi. Búgingi reformada memlekettik emes sektordy jergilikti bas­qarý organdarymen belsendi yntymaqtastyrý josparlanǵan. Osy tapsyrmalar tıisinshe mindetti túrde oryndalýy qajet. Álemdi silkiniske salǵan tabıǵı apattarǵa, ekstremıstik áreketter men ekonomıkalyq daǵdarystar jáne saıası-áskerı qaqtyǵystar sııaqty syrtqy jaǵymsyz faktor­lardyń da keri áseri az bolmaı tur. Soǵan qaramastan, der kezin­de jedel is-qımyldarymyz ben eko­nomıkalyq-áleýmettik qor­ǵaný sharalaryn qoldanyp, udaıy alǵa basyp kelemiz. Elbasy atap kórsetkendeı, eń basty qundylyǵymyz, táýelsizdigimizdiń tiregi – el birligin kózdiń qara­shyǵyndaı saq­taı bilýimiz kerek. «Tórtinshi re­formanyń bire­geı­lik pen birlik degen baǵyttaryn qa­lyp­tastyrý úshin ­eki ne­gizgi tetik qa­­­lyp­­tas­qan. Onyń birinshisi – Qazaqstan halqy Assambleıasy ınstıtýty. Ekin­shi­si – barsha qazaq­stan­dyqtardyń alpys eki tamyryna qan teýip, rýhyn kóteretin qazaq halqynyń dana halyq ekenin álemge pash etetin, júregimizge jyly, qonymdy da jaqyn bolǵan jańa ıdeıa ol – Máńgilik El, jalpyulttyq patrıottyq ıdeıasy» dedi Elbasymyz. Memleketimizdi, ekonomıka men qoǵamdy damytý úshin qaǵıdatty jańa quqyqtyq orta qalyptastyratyn 59 zań kúshine enip, qyzmet atqarýda. Reforma memlekettik qyzmettegi júıeni ózgertedi. Bul óte qajet. Joǵary oqý oryndaryn bitire sala birden basshylyq qyzmetke ornalasa qalatyn dókeılerdiń qaýqarsyz balalarynyń sany azaıady. Osy turǵydan «100 naqty qadam» Ult Josparyn júzege asyrý arqyly jańa belesterdi baǵyndyryp, sheberliktiń shyńy­na jete bilsek, ómir sapasyn jaq­sartamyz. Erinbeı eńbek etsek, talmaı ǵylym izdep, jalyqpaı tehnıkany meńgersek, turmysymyz jaqsy, abyroıymyz asqaq bolady. Memleketimizdiń táýelsizdigin, qýattylyǵy men turaqtylyǵyn, qaýipsizdigi men berekesin, sáýletti de dáýletti turmysyn gúldendire alamyz. Ǵasyrlar qoınaýynda ata-­babalarymyzdyń kóptegen urpaqtary úshin Qazaqstannyń táýelsizdigi asyl arman bolyp kelse, ol qazir birte-birte oryndalyp keledi. Álemniń uly oıshyldarynyń biri Volter «Memleketti qurý úshin bir ǵana uly tulǵa jetkilikti» degen eken. Kóregendiligi men danalyǵynda shek joq, alystan kózdeıtin alǵyr, asa kórnekti reformator, belgili strateg, talaby bıik, talǵamy zor, jasampaz tulǵa, Qazaqstan halyqtar dos­tyǵynyń sımvoly bolǵan, Elbasy Nursultan Nazarbaev jańa ıdeıalarmen aldyn ala durys josparlar jáne baǵdarlamalyq usynystar jasaýda jahannyń iri tanymal saıasatkeri, álemniń qaıtalanbas zaman tulǵasy eke­nin aıtqym keledi. Ol – ortaq Otanymyz, týǵan topyraǵymyz, qasıetti mekenimiz máńgilik Qazaq elin dáýletti, órkenıetti elder qataryna qosqan kóshbasshy ǵana emes, sonymen birge, ár azamattyń baqýatty, alańsyz ómir súrýine jaǵdaı jasaǵan uly tulǵa. El keleshegin áriden oılaı­tyn Elbasymyzdyń kemel saıasatynyń arqasynda, búginde ult pen ulystardyń birlik-yntymaǵynyń uıytqysy bolǵan mártebeli qazaq halqynyń iltıpattyǵy men keńdiginiń arqa­synda búginde kópultty memle­ketimizde yntymaqtyń oshaǵy jaǵylyp, turaqtylyqtyń týy tigildi. Osyndaı elimizde barsha qazaqstandyqtardy bir maqsatqa jumyldyryp, bizdiń ortaq armanymyz Uly Dala elin teńdesi joq birliktiń arqasynda jasampaz uly istermen bıik belesterge kótere alatynymyzǵa men kámil senemin. Sebebi, bizdiń tiregimiz – Táýelsizdik, tilegimiz – Turaqtylyq, bilegimiz – Birlik. Bolmys-bitiminde áleýmet súısinetin qasıetteri mol már­te­­beli qazaq halqynyń daryn­­­dy­lar men danalardy, da­nysh­­pandar men ulylardy, Nursultandaı kósemderdi týǵyz­ǵan jomart qazaq halqynyń aqyl-oı bilimine, orasan zor qa­biletine senemin. Bar áleýetin áli almaǵan, bolashaqta alatyn qazaq halqynyń Máńgilik El aıasynda áli talaı asýlardy asyp, talaı belesterdi baǵyndyratyn parasaty men talantyna, qaısar rýhyna senemin. Tuńǵysh Prezıdentimiz Nursult­an­ ­Nazarbaevtyń «Qa­zaqstan-2050» Stra­tegııa­synda Máń­gilik Elge bastaıtyn abyroı­ly da már­tebeli joldyń irgesin qalap, halqymyzdyń asqaq armany men bıik murattaryna jol bastady. Memleketimiz abyroıly jeńisterge jetip, órkenıetti, dáýletti el qatarynda bolyp, álem sahnasynda ulttyq memleket retinde saltanat quratynyna senemin. Saltanatymyz qashanda baıandy bolsyn, máńgilik bolsyn, ardaqty Qazaq eli, qurmetti ázız halqym! Qazaqbaı QASIMOV, Qazaqstan halqy Assambleıasynyń múshesi, fılosofııa ǵylymdarynyń doktory, professor. ALMATY.