ASTANA. 25 qańtar. 19132 áskerı bóliminiń avıasııalyq bazasynda Qazaqstan Áskerı-áýe kúshteriniń jas ushqyshtary alǵash ret saptyq bólimderde ushýǵa kiristi. Bul týraly egemen.kz tilshisi habarlady.
Ekıpaj komandıriniń kómekshileri retinde MI-17V-5 pen «Eýrokopter» ES-145 tikushaqtarynda alǵashqylardyń biri bolyp leıtenant Arman Qarabalın men Mádı Aqarys kók aspanǵa qalqydy.
«Meniń maqsatym Áskerı-áýe kúshteriniń laıyqty ushqyshy jáne egemendi elimizdiń áýe keńistigin kúzetý», dep oıymen bólisti Mı-17 býynynyń ushqyshy leıtenant Arman Qarabalın.
«Men osy áskerı bólimde, Otanymyzdyń elordasynda qyzmet atqaryp júrgenime qýanyshtymyn. Ushqysh bolý bala kezimdegi armanym bolatyn. Tálimgerlerim men komandırlerimniń úkilegen úmitterin aqtaı alatynyma senimdimin», dep ES-145 býynynyń ushqyshy leıtenant Mádı Aqarys sózin tolyqtyrdy.
Jaqynda ǵana 2015 jyldyń qazanynda bul bozbalalar T.Bıgeldınov atyndaǵy Keńes Odaǵynyń eki márte batyry Áýe qorǵanysy kúshteriniń Áskerı ınstıtýtyn bitirdi. Jas ushqysh ofıserler retinde Qazaqstan ÁÁK-niń avıasııalyq bazasyna keldi. Bilikti ushqyshtar retinde bozbalalardyń alǵashqy ushýlaryna jerústi daıyndyq pen ruqsat alý úshin synaq tapsyrý negiz boldy.
Áýe qorǵanysy kúshteri bas qolbasshysynyń basqarmasynda aıtyp ótkendeı, jas ushqyshtardyń mundaı serpilisi avıatorlardyń jas býynynyń áýege jyldam qalqyp ushýyna, kúrdeli ushý kásibiniń barlyq búge-shigesin meńgerýine jáne jaýyngerlik tapsyrmalardy oryndaýǵa bilek sybana kirisýge talpynǵandaryn kórsetedi.
Dastan Kenjalın.
Derek, sýret: Qazaqstan Respýblıkasy Qorǵanys mınıstrligi.