ASTANA. 25 qańtar. Astana qalasy Ortalyq saıabaǵynda áskerı qyzmetshiler arasynda shańǵymen júgirýden jarys ótti. Bul týraly egemen.kz tilshisi habarlady.
Oǵan Qorǵanys mınıstrliginiń Ortalyq apparaty, Qarýly Kúshterdiń Bas shtaby, bas basqarmalary, ortalyqtary, Aqmola óńirlik garnızonynyń áskerı bólimderi men mekemeleriniń 300-ge jýyq áskerı qyzmetshisi qatysty.
«Shańǵy daıarlyǵy jaýyngerlik daıarlyq baǵdarlamasyna kiredi. Biz shańǵyda júgiremiz, oq atamyz. Shańǵy daıyndyǵy áskerı qyzmetshilerdiń jaýyngerlik daıarlyǵynyń ajyramas bóligi bolyp qalýy tıis. Barlyqtaryńyzǵa saıysta sáttilik, jeńis tileımin», dedi Qorǵanys mınıstriniń birinshi orynbasary – Qarýly Kúshterdiń Bas shtabynyń bastyǵy general-polkovnık Sáken Jasuzaqov.
Sport komıtetiniń tóraǵasy – Armııa ortalyq sport klýbynyń bastyǵy Aıtalap Qorǵambaevtyń aıtýynsha, jaýyngerdiń tolyq jaraqtandyrylýymen mundaı shańǵy jarysy Qazaqstanda alǵash ret ótkizilip otyr.
Birneshe saǵat buryn saıysqa qatysýshylar úsh ret júgirip ótti. Onyń árqaısysynda úsh kóshbasshy aıqyndaldy. Alǵashqy júgirýde birinshi oryndy Astana qalasynyń Qorǵanys isteri jónindegi departamentiniń komandasy, ekinshi júgirýde birinshi oryndy Qarýly Kúshterdiń Áskerı polısııasy bas basqarmasy, úshinshi júgirýde 68665 áskerı bóliminiń áskerı qyzmetshileri altyn medaldi jeńip aldy. Jalpy komandalyq esepte týrnırdiń bas júldesin 68665 áskerı bóliminiń komandasy ıelendi. «Garnızon arasynda biz birinshi oryndy ıelendik, óte qýanyshtymyz. Komandamyz myqty ári tatý. Biz bul jarysqa daıyndaldyq, jeńiske ábden laıyqtymyz», dep atap ótti jeńis tuǵyrynan kóringen komandanyń áskerı qyzmetshisi serjant J.Qalıbekova.
Armııalyq shańǵyda júgirý Qarýly Kúshter ofıserleriniń, kelisimshart boıynsha áskerı qyzmetshileriniń, áıel áskerı qyzmetshilerdiń dene daıarlyǵynyń deńgeıin arttyrý, olardyń sporttyq sheberlikteri men áskerı-kásibı daıyndyǵynyń deńgeıin kóterý maqsatynda ótkizildi.
Qazaqstandyq armııada dene daıarlyǵy jaýyngerlik daıarlyqtyń negizi bolyp tabylady. Qarýly Kúshterdiń ofıserleri men kelisimshart boıynsha áskerı qyzmetshileri udaıy negizde prezıdenttik test, aı saıyn dene daıarlyǵy boıynsha normatıvter tapsyrady. Al jyldyń sońynda qorytyndy tekseriste ózderiniń kórsetkishterin rastaıdy.
Dastan Kenjalın.
Derek, sýret: Qazaqstan Respýblıkasy Qorǵanys mınıstrligi.