ALMATY. 25 qańtar. Almaty qalasyndaǵy Qytaı Halyq Respýblıkasynyń Bas konsýldyǵy men Qazaqstan Respýblıkasynyń Ulttyq kitaphanasy 2016 jylǵy 26 qańtar kúni, saǵat 15:00-de Qazaqstan Respýblıkasy Ulttyq kitaphanasynda ótetin «Uly Jibek joly – Qytaı mádenıetiniń kúni» atty is-shara ótkizbek. Bul týraly egemen.kz tilshisi habarlady.
Búgingi, eki el arasyndaǵy qarym-qatynas damý tarıhyndaǵy jaqsy kezeńderdi bastan keship otyrǵan kezde, eki el halyqtarynyń birin-biri odan ári tanýǵa degen nıetteri kúnnen-kúnge artýda.
Osyǵan baılanysty, Almaty qalasyndaǵy Qytaı Halyq Respýblıkasynyń Bas konsýldyǵy Qazaqstan Respýblıkasynyń Ulttyq kitaphanasymen birlesip, «Uly Jibek joly – Qytaı mádenıetiniń kúni» atty is-shara ótkizbekshi. Uıymdastyrýshylardyń aldyna qoıǵan maqsaty – qazaqstandyq jurtshylyqqa qytaıdyń shynaıy dástúrli mádenıetin kórsetý, eki eldiń baýyrlas halyqtary arasyndaǵy ózara dostyq pen túsinistikti ári qaraı nyǵaıtý.
Mádenıet kúni baǵdarlamasy: Qytaıdyń Tıanszın qalasynyń óner qaıratkerleri, qytaı halyq ánderin, mýzykalaryn, Pekın operasyn jáne Qytaıdyń basqa da jergilikti mýzykalyq dramalaryn oryndaıtyn I-shi memlekettik dárejedegi Lı Hýn, Van Hýmına, Chjao Szın, Van Bın sekildi ártisterdiń qatysýymen ótetin konsertten, sondaı-aq, fokýs jáne akrobattyq qoıylymnan, qarapaıym qytaılyqtyń kúndelikti turmysy, qytaı qalalary men aýyldarynyń qarqyndy ósýi jaıly sýretteıtin 60 fotony qamtıtyn Tempo of China fotokórmesinen, qytaı kórkem fılminiń kórsetiliminen turady.
Is-shara Qytaıǵa jáne qytaı mádenıetine qyzyǵýshylyq tanytqan barsha qaýymǵa arnalady.
Aınash Esalı.
Derek, sýret: egemen.kz.