QYZYLORDA. 25 qańtar. Oblys ortalyǵynda 23 qańtar kúni saǵat 17.30 shamasynda Sultan Beıbarys kóshesinen ótip bara jatqan jol-patrýldi polısııa batalonyna «kópir ústinen belgisiz bir azamattyń sekirip ketkendigi» jóninde habarlama kelip túsedi. Bul týraly egemen.kz habarlady.
Atalǵan habarlama boıynsha polısııa aǵa leıtenanty Shattyq Jaısańbaev, polısııa aǵa serjanty Baqytjan Áshirbekov pen Nurlybek Nurtaev «Syrdarııa» kópirine dereý jetip, ózenniń aǵysymen batysqa qaraı aǵyp bara jatqan azamatty baıqaıdy. Aýa raıynyń qolaısyzdyǵyna qaramastan, syrtqy kıimderimen sýǵa túsip, azamatty qutqaryp alady, alǵashqy dárigerlik kómek kórsetedi. Oqıǵa basyna jedel járdem qyzmeti shaqyrylyp, azamat Qyzylorda qalalyq aýrýhanasyna jetkizildi.
Azamattyń hal-jaǵdaıy jaqsy dep baǵalanýda, ómirine eshqandaı qaýip tónip turǵan joq. Qazirgi tańda azamattyń bul qadamǵa barý sebepterin jan-jaqty zerdeleý maqsatynda tıisti jumystar júrgizilýde.
Erjan Baıtiles.
Derek, sýret: egemen.kz