QYZYLORDA. 25 qańtar. Máskeýdegi «Skolkovo» ınnovasııalyq ortalyǵy telekommýnıkasııa, ǵarysh jáne ıadrolyq tehnologııa, bıomedısına syndy zaman talabyna saı 50 jobany Qazaqstan naryǵyna ákelýge daıyn. Bul týraly egemen.kz tilshisi habarlady.
22-23 qańtar kúni Máskeý qalasyna jumys saparmen barǵan Qyzylorda oblysynyń ákimi Qyrymbek Kósherbaev pen «Skolkovo» ınnovasııa ortalyǵy basshylyǵynyń kezdesý barysynda aıtyldy. Kelisim kezinde bilikti mamandar daıarlaý aıasyn keńeıtý de sóz boldy.
Kezdesý barysynda qos tarap «Baıqońyr» kesheninde telekommýnıkasııa jáne ǵarysh salasyn damytý boıynsha birlesip jumys isteý máselesin talqylady. Naqtylap aıtqanda, sóz kishi spýtnıkterdi ushyrý týraly boldy. «Skolkovo» orbıtalyq ushyrý ortalyǵy men Máskeý avıasııalyq ınstıtýtynyń alǵashqy spýtnıgi 2016 jyldyń qazan aıynda «Baıqońyr» ǵarysh aılaǵynan ushyrylady dep josparlanýda.
Máskeýlikter Qyzylorda oblysynan barǵan áriptesterine Skolkovsk ǵylym jáne tehnologııalar ınstıtýtynda júzege asyrylyp jatqan ınjenerlik bilim berýdiń jańa modelin tanystyrdy. Oblys ákimi Skolkovsk ınstıtýtynyń magıstrlik baǵdarlamasyna qyzyǵýshylyq tanytty. Sońǵy eki jylda Qyzylorda oblysynyń 320 jas óreni Máskeý men Sankt-Peterbýrgtyń ınjenerlik-tehnıkalyq bilim beretin oshaqtarynda bilim alyp jatqandyǵyn eskersek, eki jaqtyq kelisimniń paıdasy zor.
Munan bólek oblys ákimi kásipkerlik ortany damytý jónindegi ekonomıkalyq jáne áleýmettik saladaǵy sharalar keshenin júzege asyrý maqsatynda RF Úkimeti qurǵan «Strategııalyq bastamalar agenttigi» jáne «Reseılik venchýrlik kompanııa» basshylarymen kezdesý ótkizdi. Onda Ulttyq tehnologııalyq bastamasy aıasynda qarjy jáne kadrlyq damý boıynsha negizgi tehnologııalar men qajetti sharalardy anyqtaý jáne daǵdarystyq daǵdylar ıelerin qatystyrý mehanızmderin engizý boıynsha júıelik sheshimder qabyldanady.
«WorldSkillsRussia» qorynyń bas dırektory R.N.Ýrazovpen kezdesý barysynda elimiz tegin kásibı bilim berý júıesine kóshýge baılanysty kadrlardy daıyndaý jáne kásibı-tehnıkalyq bilim júıesin damytý boıynsha seriktestik múmkindikteri talqylandy.
Erjan Baıtiles.
Derek, sýret: egemen.kz