О́SKEMEN. 29 qańtar. Shyǵys Qazaqstan oblysynyń Úrjar aýdanynda el Táýelsizdiginiń 25 jyldyǵyna arnalǵan búrkitshilerdiń eresekter arasyndaǵy respýblıkalyq X chempıonaty men aýdan búrkitshileriniń baýashar merekesi bastaldy. Bul týraly egemen.kz tilshisi habarlady.
Jarysqa Astana qalasy men elimizdiń 10 oblysynan kelgen qusbegiler qatysty. Onyń ishinde qansonardy qyzyqtaǵan jurtshylyq 29 búrkit pen 4 qarshyǵanyń ónerin tamashalaýda. Altaı-Tarbaǵataı elinde tuńǵysh ret uıymdastyrylǵan búrkitshiler festıvali Maqanshy aýylynyń irgesindegi Jaıtóbede ótip jatyr.
«Qazaqstanda ulttyq sport túrleri keńinen damyp keledi. Táýelsizdigimizdiń arqasynda ulttyq oıyndarymyz ben ónerimiz qaıta jańǵyrý ústinde. Búrkitshiler merekesi Shyǵys óńirinde, Abaı elinde tuńǵysh ret uıymdastyrylyp otyr. Bul sharany joǵary deńgeıde ótkizýge Qazaqstan búrkitshiler odaǵynyń múshesi, ulttyq ónerdiń maıtalman sheberi Táttimbet Kápuly bastaǵan úrjarlyq jerlesterimiz úlken úles qosýda. Ata-babamyzdan qalǵan murany ulyqtaýǵa elimizdiń 11 óńirinen kelgen búrkitshilermen birge Úrjar aýdanynyń qusbegileri de atsalysyp jatyr. Keleshekte qusbegilik, búrkitshilik ónerdi odan ári óristete túsý maqsatynda bul sharany óńirlik deńgeıde jalǵastyrýdy kózdep otyrmyz», – dedi atalǵan sharanyń ótýine zor qoldaý kórsetken Úrjar aýdanynyń ákimi Serik Zaınýldın.
Aıta ketken lázim, búrkitshiler baýasharyna elimizdiń ulttyq sport túrleri qaýymdastyǵynyń birinshi vıse-prezıdenti Erlen Ospanov, «Qyran» federasııasynyń atqarýshy dırektory Baǵdat Múptekeqyzy, Mádenıet jáne sport mınıstrliginiń ulttyq sport pen saıatshylyqtan bas jattyqtyrýshysy Bazarbek Kúntýǵan jáne belgili qusbegiler men synshylar qatysýda. Jarystyń alǵashqy kúninde búrkitshilerdiń kıimi, at ábzelderi tekserildi. Ulttyq naqyshta tigilip, oıý-órnektermen bezendirilgen saptama etik, qysqa ton, qalyń shalbar, búrkitshi bııalaıy, shyrǵa baldaq, tomaǵa, er qarýy – pyshaq, qustyń jemsaýyty sekildi barlyq qusbegine qajetti qural-jabdyqtary nazarǵa alynyp, búrkittiń turpaty men búrkitshiniń kıimi baǵalandy. Budan soń saıystyń qusty qolǵa shaqyrý, shyrǵa tartý, erkin ushý kezeńderine de kezek jetip, saıatshylar qyran qustarynyń baby qalaı ekenin kórsetti. Jarysty uıymdastyrýshylardyń aıtýynsha, bul ár óńirden kelgen qyran búrkitter men qarshyǵalardyń jergilikti jer jaǵdaıy men tabıǵat raıyna beıimdelýine de kómektesedi.
Jarystyń ekinshi kúni búrkitterdiń ańǵa shalymdylyǵy synǵa túsip, shyn mánindegi qan qyzdyrar salbýrynmen jalǵasady.
Dýman Anash.
Derek, sýret: egemen.kz.