ASTANA. 9 qańtar. Nıkaragýada zıka bezgegin juqtyrǵandar sany 38 adamǵa jetti. Bul týraly TASS aqparat agenttigine silteme jasaǵan egemen.kz tilshisi habarlady.
Qaýipti indetti juqtyrǵandardyń basym bóligi memleket astanasy Managýa qalasynyń turǵyndary. Osyǵan baılanysty ótken aptanyń sońǵy kúnderi aýrý taratqysh aedes aegypti masalaryn joıý úshin 1 myńǵa jýyq adam jumyldyryldy. Sondaı-aq, turǵyn úı keshenderi men mekemelerde arnaıy is-sharalar uıymdastyryldy.
Dúnıejúzilik densaýlyq saqtaý uıymy 2016 jyldyń 1 aqpanynda Ońtústik jáne Soltústik Amerıka elderinde zıka bezgeginiń jyldam taralýyna baılanysty dabyl qaqqan. Bul indetti juqtyrǵan bolashaq anadan mıkrosefalııa aýrýymen aýyratyn sábıler týylady. Ol óz kezeginde sábıdiń bas súıeginiń qajetti mólsherde ósýine kedergi jasap, mı qurylysynyń damýyna zııanyn tıgizedi. Osydan soń, náresteniń oılaý, kórý, estý qabyletteri tómendeıdi. Bul kezde arnaıy vaksınalar kómektespeıdi.
Aıan Ábdýálı.
Derek: TASS.
Sýret: ilpost.it.