О́tken jyly agroónerkásiptik keshen salasyn qarjylandyrýǵa 363 mlrd.teńge baǵyttaldy. Osy qarajattyń 64 mlrd.teńgesi AО́K sýbektilerin qarjylaı saýyqtyrýǵa jumsaldy. Bul shamamen 2 mln.gektar egistik alańy aınalymyn jáne 8 myńǵa jýyq óndiristegi jumys oryndaryn saqtap qalýǵa yqpal etti. Osy rette, qarjylaı saýyqtyrýǵa qol jetkizgen agroónerkásiptik keshen sýbektileriniń qarjylyq júktemesi aıyppuldar men ósimaqylaryn shyǵysqa shyǵarý esebinen 1,8 mlrd.teńgeden astam somaǵa tómendedi.
Osylaı dedi Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda «QazAgro» ulttyq basqarýshy holdıngi» AQ basqarma tóraǵasy Nurlybek Malelov. Onyń aıtýyna qaraǵanda, 2015 jyly qarajattyń kóp bóligi holdıng tarapynan nesıeleý men lızıngke baǵyttalǵan. Shamamen 15,5 myń nesıe berilip, 4 myń birlikten astam aýylsharýashylyq tehnıkasy satyp alynyp, lızıngke berilgen. Jáne de ótken jyldyń qorytyndysy boıynsha, agrónerkásiptik kesheniniń nesıe qorjynyndaǵy holdıng úlesi 43%-dy qurady. Osy rette 49 myń qaryz alýshy holdıngtiń tutynýshylary bolyp tabylady.
Sonymen qatar, holdıngtegi agrarlyq sektordy nesıeleýdiń jalpy kólemindegi shaǵyn jáne orta bıznestiń úlesi 88% bolyp otyr. Jáne de «QazAgro» kompanııasy tobymen júzege asyrylatyn baǵdarlamalardyń esebinen 29 myńnan astam adam jumyspen qamtylyp, jańa jumys oryndary ashyldy. Al egin egý jáne jınaý naýqanyna bıýdjettik nesıeni eseptegende holdıng tarapynan 101,2 mlrd.teńge baǵyttalyp, bul jalpy 6,5 mln.ga alańda barlyq qajetti agrotehnıkalyq sharalardy júrgizýge múmkindik berdi, dedi holdıngtiń basqarma tóraǵasy.
Bıylǵy jyly kóktemgi-egis jáne oraq jumystaryn qarjylandyrý úshin «QazAgro» holdıngine 60 mlrd.teńge bıýdjettik nesıe qarajaty berilip, ony qaryz túrinde holdıngtiń enshiles uıymdary men bankterdiń arasynda bólý boljanyp otyr. Bul rette onyń enshiles kompanııalary – Agrarlyq nesıe korporasııasy men Azyq-túlik kelisimshart korporasııasy óz kezeginde, aýylsharýashylyq taýar óndirýshilerin tikeleı jáne aýyldyq nesıe seriktestikteri men shaǵyn jáne qarjy uıymdarynyń keńeıtilgen aımaqtyq jelileri arqyly da qarjylandyra alady. Eldegi kúrdeli naryq jaǵdaıyna qaramastan, bıýdjettik qarjylandyrý ótken jyldardaǵy sııaqty AО́K sýbektilerin nesıeleý sharttaryn saqtap qalýǵa yqpalyn tıgizedi.
Sondaı-aq, holdıngtiń AО́K-ti nesıeleýdiń qoljetimdi júıesin qalyptastyrý jónindegi qyzmeti bankterdi, nesıe seriktestikterin, lızıng kompanııalaryn jáne AО́K nesıeleýshi basqa da qarjy uıymdaryn qorlandyrý, shaǵyn qarjy uıymdaryn qorlandyrý deńgeıin arttyrý arqyly júzege asyrylatyn bolady. Osylaısha, fermerler birneshe qarjylandyrý quraldaryn paıdalana alady. Mysaly, ekinshi deńgeıli bankter arqyly nesıeleý boıynsha aýylsharýashylyq taýar óndirýshileri banktiń reıtıngine baılanysty 7,41% mólsherlememen nesıe qarajatyn alady. Al ekinshi qarjylandyrý – Agrarlyq nesıe korporasııasynyń aımaqtardaǵy ókildikteri arqyly tikeleı ekinshi deńgeıli bankterdiń kepildigimen nesıeleý boıynsha bolmaq. Bul rette olar úshin nesıe mólsherlemesiniń jyldyq kólemi 5%-dy quraıdy, dep atap ótti Nurlybek Malelov.
Elmıra MÁTIBAEVA,
«Egemen Qazaqstan».