Keshe Ortalyq kommýnıkasııalar qyzmetinde Investısııalar jáne damý mınıstrliginiń Kólik komıteti tóraǵasynyń orynbasary Dmıtrıı Potlov baspasóz máslıhatyn ótkizdi. Ol «Nurly Jol» ınfraqurylymdyq damý baǵdarlamasynyń sheńberinde salynyp jatqan «Quryq» keshendi parom portynyń qurylys jumystary men temirjoldyń mańyzdy nysandary jóninde aıtty.
Qazirgi tańda álemdik ekonomıkalyq qıyndyqtarǵa qaramaı Qazaqstan ınfraqurylymdyq baǵdarlamalaryn jalǵastyryp jatqanyn aıtqan komıtet tóraǵasynyń orynbasary, Kaspıı teńiziniń jaǵalaýynda boı kótergen «Quryq» portynyń mańyzy jóninde áńgimeledi. Búgingi kúnde júkti jóneltip ári qabyldaýda barlyq múmkindikterin sarqa paıdalanyp otyrǵan «Aqtaý» porty qazirgi tranzıttik taýar aǵynyn ıgerýge murshasy bolmaı otyrǵan kórinedi. Sol sebepten, salynyp jatqan «Quryq» keshendi paromdyq porty Aspanasty elinen Batys Eýropaǵa jol tartatyn júk kerýenderin Kaspıı teńizi arqyly Ázerbaıjanǵa, odan ári Túrkııa arqyly kózdelgen memleketterge jetkizýge septesetin bolady.
Porttyń salynýy elimizdiń tranzıttik múmkindigin arttyra túsetinin táptishtegen D.Potlov, keshendi nysannyń asa paıdaly tustary týraly aıtyp ótti. «Keshendi «Quryq» paromdyq porty Qytaı men Eýropa arasynda jasalyp jatqan jańa tranzıttik dálizdiń mańyzdy ortalyǵynyń biri bolady. Buǵan deıin «Arqalyq – Shubarkól» jáne «Beıneý – Jezqazǵan» temirjol magıstraldaryn júzege asyrǵanymyz belgili. Endi «Quryq» stansasy iske qosylsa jáne portqa taıaý jerge salynatyn zaýyttar boı kóterse el bıýdjetin molaıta túsetini anyq. Buǵan qosa, osy jerden sý kólikterin jóndeıtin jáne oǵan qajet qosalqy bólshekter jasap shyǵaratyn zaýytta salynady. Bul shara «Nurly Jol» ınfraqurylymdyq baǵdarlamasyn júzege asyrýmen qatar, táýelsizdigimizdiń de irgesin nyǵaıta túsedi. Sondaı-aq, búginde qurylys jumystarynda 500-den astam adam jumysqa tartylǵan bolsa, port paıdalanýǵa berilgen soń 100-den astam turaqty jumys ornymen qamtamasyz etiledi», dedi.
Onyń sózine ılansaq, keshendi paromdyq porttyń jáne oǵan tıesili nysandardyń qurylysy josparǵa saı júrgizilip jatyr eken. Odan keıin sóz alǵan «Qazaqstan temir joly» UK» AQ-tyń Temirjol jelileri qurylysy jónindegi dıreksııasy fılıalynyń dırektory Baqyt Qarsaqbaev jýrnalısterdiń suraǵyna oraı, elordanyń jańa temirjol vokzaly 2017 jyldyń kókteminde salynyp bolyp, paıdalanýǵa beriletinin aıtty. «Bul jobany QTJ júzege asyrýda. Qurylys nysandary keler jyldyń sáýir aıyna deıin salynyp bitedi. Osy turǵyda vokzaldyń úlken termınaly bar ǵımarat jáne oǵan kiretin 2 shaqyrymnan astam estakada qamtylady», dedi ol.
Nurbaı ELMURATOV,
«Egemen Qazaqstan».