Keshe Qaraǵandydaǵy Dostyq úıinde Qazaqstan halqy Assambleıasynyń «Meıirimdilik kerýeni» atty jalpyulttyq qaıyrymdylyq aksııasy aıasynda oblystyq Qazaqstan halqy Assambleıasynyń janyndaǵy Analar keńesiniń «Birge ómir súrý óneri» atty ıgi sharasy ótti.
О́tken jyldyń 27 qarashasynda Astanada Qazaqstan halqy Assambleıasynyń qoldaýymen qaıyrymdylyq uıymdary, mesenattar jáne donorlardyń birinshi Respýblıkalyq sezi ótken. Sol jıynnyń qorytyndysynda «Meıirimdilik kerýeni» aksııasynyń tusaýy kesilgen bolatyn. Atalǵan shara Qaraǵandy oblysynda da jurtshylyq tarapynan keńinen qoldaý tapty deýge negiz bar. Sonyń bir dáleli retinde oblystyq Qazaqstan halqy Assambleıasynyń osy jolǵy «Birge ómir súrý óneri» aksııasyn ataýǵa bolady.
Qaıyrymdylyq sharasy aıasynda oblystyq Qazaqstan halqy Assambleıasyna habarlasqan ata-analardyń sal aýrýyna shaldyqqan balalaryna kómek kórsetildi. Budan bólek, Analar keńesiniń músheleri «Qulynshaq» balalar úıindegi jetimderdi óz qamqorlyqtaryna alý jóninde bastama kóterdi.
Uıymdastyrylýy jaǵynan joǵary deńgeıde ótken qaıyrymdylyq sharasyna oblystyq Qazaqstan halqy Assambleıasy hatshylyǵynyń basshysy E.Qusaıyn, Analar keńesiniń tóraıymy S.Nurmaǵanbetova, Jezqazǵan qalalyq máslıhatynyń depýtaty, mesenat B.Altynbekov, «Qulynshaq» balalar úıiniń dırektory S.Búrkeeva, Qaraǵandy oblysyndaǵy qalalyq jáne aýdandyq Analar keńesteriniń tóraǵalary men músheleri, etnomádenı birlestikterdiń jetekshileri qatysty.
Qaırat ÁBILDINOV,
«Egemen Qazaqstan».
QARAǴANDY.