«Aýyldyń» kúshi agroónerkásip kesheninde

Qaraǵandy qalasynda «Aýyl» halyqtyq-demokratııalyq pat­rıottyq partııasynyń bastamasymen «Otandyq et pen sút naryǵynyń erekshelikteri jáne ony damytýdyń bolashaǵy» atty respýblıkalyq forým ótti. Forým jumysyna «Aýyl» HDPP hatshysy Bóribaı Jeksembın, atalǵan partııanyń oblystaǵy fılıalynyń, memlekettik organdardyń, «QazAgro­Qarjy», «Agrarlyq kredıttik korpo­ra­sııa», «Aýyl sharýashylyǵyna qarjylyq kómek kórsetý qory» kompanııalary bólimsheleriniń jáne agroqurylymdardyń basshylary men mamandary qatysty. Qazirgi tańda Dúnıejúzilik saýda uıymyna múshe bolǵan Qazaqstan úshin aýyl sharýashylyǵyn damytý, onyń ishinde et jáne sút salasyna basymdyq berý máselesi ózekti bolyp tur. Jalpy, sarapshylardyń esebinshe, bizdiń elimizdiń ishki naryqty et jáne sút ónimderimen tolyq qamtamasyz etip qana qoımaı, eksportqa shyǵarýyna da mol múmkindigi bar. Mysaly, mamandardyń aıtýynsha, Qazaqstannyń jyl saıyn Reseı men Qytaıdyń ózine jalpy somasy 5 mlrd. AQSh dollary bolatyn sıyr etin eksporttaýǵa múmkindigi bar eken. Alqaly jıynǵa qatysýshylar sońǵy jyldary elimizde agroónerkásip keshenin qoldaý maqsatynda birqatar mańyzdy sharalardyń qabyldanǵanyn biraýyzdan atap ótti. Mysaly, 2013 jyldan beri «Agrobıznes-2020» baǵ­dar­lamasy júzege asyrylyp keledi. Osy baǵdarlama aıasynda aýyl sharýa­shy­lyǵyn damytýǵa bıýdjetten qomaqty qarjy bólinýde. Qazirgi tańda memleket agroónerkásip salasyn tikeleı nesıelendirýden basqa, qoldaýdyń naryqqa beıimdelgen basqa da tetikterin qarastyrǵan. Mysaly, qural-jabdyqty, tehnıka men tórt túlik maldy, ınves­tı­sııalyq shyǵyndardy lızıngke nemese nesıege alý boıynsha paıyzdyq mól­sherlemesin sýbsıdııalaýǵa kóshti. Forýmda baıandama jasaǵan «Aýyl» partııasynyń hatshysy Bóribaı Jek­sembın atalǵan sharalardyń «100 naq­ty qadam» Ult Josparyn iske asyrý aıasynda qabyldanǵanyn atap ótti. «Bul sharalardyń agrarshylar úshin óte mańyzdy ekenin eskere otyryp, «Aýyl» partııasy elimizde agroónerkásip keshenin damytý jaıy men bolashaǵyn, onyń ishinde memlekettiń agrarlyq sektordaǵy jańa bastamalardy iske asyrý mehanızmin túsindirý jáne talqylaý boıynsha dóńgelek ústelder, semınarlar uıymdastyrylýda», – dedi B. Jeksembın. Jalpy, otandyq mal sharýashylyǵy áleýetin iske asyrý úshin usaq taýarly óndiristi belsendi túrde paıdalaný kerektigi jıynda basa aıtyldy. Osy maqsatta shaǵyn sharýa qojalyqtary men jekeniń qosalqy sharýashylyǵyn memlekettik turǵydan yntalandyrý sharalaryn ázirlep, iske asyrý mindeti kún tártibinde ótkir tur. Sondaı-aq, jerdi tıimdi paıdalaný máseleleri de óz sheshimin tabýy kerek. Sonymen qatar, kolledjder men kásibı mektepter jáne joǵary oqý oryndary deńgeıinde aýyl sharýashylyǵy salasyna qajetti mamandar daıarlaý isin de ilgeriletken jón. Álbette, bul máselelerdiń bári de saladaǵy zańnamalardy jetildirýdi talap etedi. «Aýyl» partııasynyń ókilderi saladaǵy kókeıkesti máselelerdi sheshýge belsendi túrde atsalysýǵa ázir ekendikterin jetkizdi. Bul úshin, árıne, agroqurylymdardyń, memlekettik or­gan­dardyń, damý ınstıtýttary men qo­ǵamdyq birlestikterdiń kúsh biriktirgeni qajet-aq. Jıyn sońynda respýblıkalyq forým qarar qabyldady. Qaırat ÁBILDINOV, «Egemen Qazaqstan».