QYZYLORDA. 10 aqpan. 4-7 aqpan aralyǵynda Aqtóbe qalasynda dzıýdodan 1999-2000 jyldary týǵan jasóspirimder arasynda Qazaqstan chempıonaty máresine jetti. Atalǵan jarystan Qyzylordanyń sportshylary da júldeli oraldy. Bul týraly oblystyq sport jáne deneshynyqtyrý basqarmasyna silteme jasaǵan egemen.kz tilshisi habarlady.
Astana, Almaty qalalary men barlyq oblystardan 575 sportshy qatysqan dúbirli dodada jerlesterimiz 10 medal oljalap, jalpykomandalyq esepte ekinshi oryndy ıelendi. Birinshi oryndy Almaty oblysy, úshinshi oryndy Ońtústik Qazaqstan oblysynyń komandalary enshiledi.
Jekeleı synda 40 kılo salmaq dárejesinde Bıbihan Nábıeva (№1 OORMBJM), 57 kıloda Araılym Qanzada (Mádenıet aýyly, sport ınternat) jáne 70 kıloda Araılym Orazbaılar (Jalaǵash aýdany, sport ınternat) jaqsy óner kórsetip, el chempıondary atandy.
55 kıloda Janbolat Samatuly (Jalaǵash aýdany, sport ınternat) men 90 kıloda Nurlyhan Sharhan (sport ınternat) kúmis júldeni ıelendi.
44 kıloda Zúlfııa Baıanova, 60 kıloda Raýan Bekaly (ekeýi de №1OORMBJM), 63 kıloda Móldir Qoıbaǵar (№5OORMBJM), 70 kıloda Alısa Nurtas (Mádenıet aýyly),70 kıloda astam salmaqta Aıda Faızolla (№1OORMBJM) qola júldeni jeńip aldy.
Jeńimpaz sportshylar qyrkúıek aıynda Úndistannyń Delı qalasynda ótetin Azııa chempıonatyna joldama alý úshin aldaǵy sáýir aıynda Reseıdiń Tver, mamyr aıynda Germanııanyń Berlın qalalarynda bolatyn Eýropa kýboktaryna qatysady.
Sportshylardy jarysqa Arman Moldahanov, Qalen Qalıuly, Rıshat Býrlov, Janar Dıýsekenova, Janarbek Sansyzbaev, Ramazan Mustafaev, Aıan Asylbek, Turar Baımahanovtar daıyndady.
Erjan Baıtiles.
Derek, sýret: egemen.kz