Astanadaǵy Ortalyq saıabaqta bolǵan oqys oqıǵa kezinde attraksıon kabınasy úzilip, ishinde otyrǵan balalarmen birge jerge qulaǵan. Qaladaǵy demalys ornynyń basshylyǵy oqıǵanyń sebebi sırek kezdesetin tehnıkalyq aqaý ekenin málimdedi, dep jazady Egemen.kz.
Ortalyq saıabaqty basqaratyn kompanııa dırektory Ǵanı Hasenovtiń aıtýynsha, attraksıon tetikteriniń arasyna bógde zat túsip ketken. Sonyń saldarynan mehanızm isten shyǵyp, kabına qulaǵan.
«Mehanızmge bógde zat túsken. Qazir onyń tolyq tehnıkalyq sheshimin taptyq, endi mundaı jaǵdaı qaıtalanbaıdy. Attraksıon shaǵyn bolǵandyqtan, eshkim aýyr jaraqat alǵan joq», dedi ol.
Basshylyqtyń málimetinshe, osyǵan uqsas aqaý atalǵan qurylǵyda buryn-sońdy tirkelmegen. Qazirgi ýaqytta attraksıonnyń jumysy toqtatyldy, qaıta tolyq tehnıkalyq tekseristen ótkennen keıin ǵana iske qosylady. Ákimshilik barlyq attraksıon kún saıyn tańerteń mindetti tekseristen ótetinin atap ótti.
Attraksıon synyp, 23 adam jaraqat aldy
Oqıǵa týraly aqparat aldymen áleýmettik jelilerde taraǵan. Qala turǵynynyń aıtýynsha, 25 sáýir kúni saǵat 17:10 shamasynda birneshe aınalym jasaǵannan keıin eki qyzy otyrǵan kabına kenet úzilip ketken.
«Qyzdarymdy basyp qala jazdady» dep jazǵan turǵyn qaladaǵy barlyq attraksıonnyń tehnıkalyq jaǵdaıyn tekserýdi talap etti.