ASTANA. 11 aqpan. 91678 áskerı bólimde úıretýshi nusqaýshylardy jyl saıynǵy atpen daıyndaý bastaldy. Bul týraly egemen.kz tilshisi habaraldy.
Bólimniń áskerı qyzmetshileri tulparlarmen jaýyngerlik daıarlyq boıynsha josparly sabaqtar ótkizedi. Armııada jylqylar tehnıka óte almaıtyn taý-tastyń arasynda, taýly jerde, taıyz soqpaq joldarda paıdalanylady. Olar jaralylardy shyǵarý, júkter men oq-dárilerdi tasymaldaý, basqa da tapsyrmalardy oryndaý úshin paıdalanylyp keledi.
Áskerı qyzmetshiler jańadan kelgenderdi atqa minýge, jaýyngerlik tapsyrmalardy oryndaýǵa, atqa minýdiń negizderin úıretedi. Úıretý barysynda jylqylar kedergilerden ótip, taýly jerde jeke quramdy tasymaldaıdy. Sondaı-aq, olarǵa avtomattan shyǵatyn qatty dybystarǵa úırenisý qajet. Jaýyngerlik daıarlyq ártúrli polıgondarda ótkiziledi. Alys jerlerge jylqylardy poıyzben tasymaldaıdy.
Qarýly Kúshterde atqa miný daıyndyǵy mindetti pán bolyp sanalady. Al polıgondarda jylqylarmen jumys jasaý josparǵa baılanysty aıyna birneshe ret ótedi.
«Sáıgúlikterdi ózimiz tamaqtandyramyz. Suly, kebek, bıdaı sııaqty azyq jemdi jylqylar normaǵa sáıkes kún saıyn alyp turady. Sonymen qatar dárýmender beremiz. Janýarlardy at qoranyń jeke qoralarynda ustaıdy. Rotaǵa jylqylar úsh jasynda keledi, al olardyń qyzmet etý merzimi 5 jyl», deıdi taýly-qoryqtyq rotasynyń komandıri aǵa leıtenant Bek Qambarbekuly.
Rota janynda jylqylardyń kútimin qadaǵalap otyratyn veterınarlyq pýnkt qyzmet atqarady. Rota quramynda barlyǵy 52 júırik bar. Árqaısysy bir-bir áskerı qyzmetshige bekitilgen jáne óziniń arnaıy nómiri bar.
Qazir áskerde paıdalanylyp júrgen jylqylar byltyr Tarazda ótken Qazaq handyǵynyń 550 jyldyǵyn merekeleýge, Jarkent pen Qapshaǵaıda ótken «Qazaq eli» fılminiń túsiriliminde paıdalanyldy.
Dastan Kenjalın.
Derek, sýret: Qazaqstan Respýblıkasy Qorǵanys mınıstrligi.