ASTANA. 11 aqpan. Taıvan aralynda bolǵan zilzaladan qaza tapqandar sany 55 adamǵa jetti. Bul týraly TASS aqparat agenttigine silteme jasaǵan egemen.kz tilshisi habarlady.
Tabıǵat apatynan ásirese, Taıvan aralyndaǵy Taınan mýnısıpalıteti zardap shekti. 17 qabatty «Veıgýan» turǵyn úı kesheniniń qırandysy astynan 52 adamnyń máıiti tabyldy. Al ózge qalalarda bolǵan jer silkinisinen 3 adam mert boldy. Sondaı-aq, 80 turǵynnyń ómirinen áli kúnge deıin habar joq.
Jer asty dúmpýi 6 aqpanǵa qaraǵan túni boldy. Magnıtýdasy 6,4 balldy quraǵan zilzalanyń saldarynan aımaqta ondaǵan úıler qırap qaldy. Qazirgi kezde arnaıy qurylǵan jasaq oqıǵa ornynda qutqarý jumystaryn júrgizip jatyr. Sarapshylar iz-túzsiz joǵalǵandar arasynan aman qalǵandardyń tabylýy ekitalaı degen boljam jasady.
Aıan Ábdýálı.
Derek, sýret: TASS.